Шударга өрсөлдөөн, хэрэглэгчийн төлөө газраас “Хүчит шонхор” ХХК-ийн захирал Т.Сайнхүүг 110 сая төгрөгөөр торгох албан бичиг хүргүүлээд байгаа талаараа өнгөрсөн долоо хоногт мэдэгдсэн. Тус газраас өгсөн мэдээллээр “Хүчит шонхор” худалдааны төв нь ижил хэмжээтэй талбай түрээсэлдэг түрээслэгчдээс харилцан адилгүй төлбөр авч байгаа нь шалгалтаар илэрсэн учраас өрсөлдөөний тухай хуулийн 27.2-ийг үндэслэн 110 сая төгрөгөөр торгох арга хэмжээ авсан гэсэн юм. Харин үүсээд байгаа нөхцөл бодит байдал дээр арай өөр болохыг зарим эх сурвалж хэлж байна. Тодруулбал, “Шонхор” худалдааны төвийн махны бөөний худалдаачид өмнө нь өглөөний 06-09.00 цагийн хооронд худалдаа наймаагаа хийдэг байсан аж. Харин зургадугаар сараас эхлэн ажлын гол байруудыг бүрэн дүүрэн ашиглах, ажлын байрыг ээлжийн горимд шилжүүлэх зохицуулалт хийж одоо гурван ээлжээр ажиллаж эхэлжээ. Үүний үр дүнд махны нийлүүлэлт, борлуулалт нэмэгдэж, ажлын байранд ажиллах хүний тоо, ажлын байрны ажиллах хүчин чадал өссөнөөр өмнө нь хэрэглэгчид “Шонхор” худалдааны төвөөр цагийн хязгаарлалттай үйлчлүүлдэг байсан бэрхшээл арилж улмаар өдрөөс өдөрт өсөн нэмэгдсээр байсан махны бөөний үнийг бууруулахад голлон нөлөөлжээ. Тодруулбал, өнгөрсөн зургадугаар сарын 15-наас хойш үхрийн шинэ мах 900-1200 төгрөгөөр, зоорины мах 1000-1300 төгрөгөөр, хонины шинэ мах 1000-1200 төгрөгөөр, адууны мах 300-600 төгрөгөөр, ямааны мах 400 төгрөгөөр тус тус буурсан эерэг үзүүлэлт гарчээ.
Үүнийг доорхи статистик мэдээнээс харж болох аж. Махны төрөл | Баасан | Пүрэв | Бямба |
2013.05.17 | 2013.06.13 | 2013.07.27 |
Үхэр | Бөөн | Шинэ | 7000-8000 | 5800-7100 | 5800-6300 |
зоорь | 7600-7800 | – | – |
Жижиг | 9000-9500 | 7800-8300 | 7300-7500 |
Гуя цул | 11600-11700 | 11000 | 10500 |
ясгүй | 9800-10000 | 8000-8500 | 7800-8300 |
Хонь | Бөөн | Шинэ | 7000-7300 | 6000-6500 | 5600-6300 |
зоорь | 5500-5700 | 5500-5600 | – |
Жижиг | 8300-8500 | 7500-7800 | 7000-7200 |
ясгүй | 7600-7700 | 7000-7500 | 7000-7400 |
Адуу | Бөөн | Шинэ | 4500-5000 | 4200-4400 | 3800-4000 |
ястай | 6800 | 6000-6400 | 6000 |
ясгүй | 6500-6700 | 5500 | 6500 |
Тэмээ | Бөөний | 4300-4500 | 4500-4600 | 4200-4300 |
Жижиг | 6400-6500 | 6500-6600 | 6200-6400 |
Ямаа | Бөөн | Шинэ | 5200-5500 | 4800-5100 | 4900-5100 |
зоорь | 4600-4800 | – | – |
Жижиг | 6300-6500 | 5800-5900 | 6300-6500 |
ясгүй | 6600-6700 | 6500-6700 | 7000 |
Энэ мэтээр “Хүчит шонхор” худалдааны төв нь иргэдийн хүнсний хэрэгцээний гол хэрэглээ болсон үнэ хямд, шинэ мах махаар хангах гэсэн зорилгыг нь ШӨХТГ сайтар хянаж шалгалгүй, үндэслэл муутай баримт дээр дөрөөлөн торгуулийн арга хэмжээ авсан гэж үзэж байгаа аж. Шударга өрсөлдөөнийг хянаж, зохицуулах нь тус газрын эрхэм үүрэг. Ингэснээр хэрэглэгчдийн эрхийг тэд хамгаалах учиртай. Гэвч гаргасан шийдвэр нь шударга уу, эс шударга байна уу, хэрэглэгчдийн эрхийг бодитоор хамгаалж чадаж байна уу гэдгээ эргэж харах хэрэгтэй гэдгийг захын удирдлагууд хэллээ.
С.ОТГОН