Мөрөнгийн энтэй Завхан гол

Цаст цагаан хайрхан Отгонтэнгэрээ шүтэж, их уулын бэл дэх Даян хайрханаараа хүрээлүүлсэн, тунгалаг арвин мөрөн Завхан голоороо тэтгэгдсэн Завханчууд түүхт 90 жилийн ойгоо тэмдэглэж байна.

Завхан нутгаас төр түшилцсэн эрхэм түшээд, урлаг соёлын гавьяатнууд олон төрсөн байдаг. Монгол Улсын анхны ерөнхийлөгч П.Очирбат, удаах ерөнхийлөгч Н.Багабанди, Монгол Улсын хөдөлмөрийн баатар Ц.Намхайнямбуу, Төрийн соёрхолт, яруу найрагч Ц.Бавуудорж, Төрийн шагналт, яруу найрагч Б.Явуухулан, гавьяат жүжигчин С.Батсүх зэрэг олон хүмүүсийг нэрлэж болно. Завхан аймгийг магтан дуулсан олон сайхан дуу, шүлэг бий. Тэднээс алдарт “Завхан гол” дууны үгийг бичсэн, СТА, яруу найрагч Н.Лутбаярыг энэ удаа онцоллоо.

Н.Лутбаяр МУИС-ийн сэтгүүлчийн ангийг 1987 онд төгсөөд Завхан аймгийн “Туяа” сониноос ажлын гараагаа эхэлжээ. Сүхбаатар аймгийн харьяат тэрбээр Завхан нутгийн хүргэн болж, тус аймгийг зорьсон нь энэ аж. Тэрбээр тус аймагт найман жил амьдрах хугацаандаа олон уран бүтээлийг туурвисан. Түүний анхны уран бүтээл “Бүүвэй ээж” дуу байж. Харин төд удалгүй “Завхан гол” дууны шүлэг төрж, түүнийг хөгжмийн зохиолч Ц.Жамьян ая хийж, С.Батсүх дуулснаар Завханы төдийгүй, монголчуудын дуулах дуртай дууны нэг болсон.