Британичууд Кейт Миддлтоныг шүтэн хайрладаг. Кембрижийн герцогийн хатан гэх албан ёсны цолноос гадна түүнд “Хамгийн стильтэй алдартан”, “Моодны хатан хаан”, “Британийн наран шарлагын газрын хамгийн гоё галбиртан” гэх мэтийн албан бус нэрийг өгөөд байгаа. Ер нь сүүлийн үед Кейтийг “Ард түмний гүнж” гэх болсон байна лээ!
Тухайн цагтаа Диана гүнжийг л тэгж нэрлэдэг байв. Дианаг нас барахад сургуулийн сурагч байсан Кейт түүнтэй огт тааралдаж байсангүй. Дианаг өнгөрсний дараа хаад дээдсээ хүндэлдэг британичуудын хувьд “Ард түмний гүнж” цол эзгүй үлдсэн билээ. Харин сүүлийн үед Кейтыг Дианатай зэрэгцүүлэн авч үзэх нь их байгаа. Тэгэхлээр Кейт гүнж өөрийн нутаг нэгтнүүдийн дунд хүндтэй байрыг хэдийнэ эзэлсэн гэж болно.
Язгууртан гаралгүй ч гэсэн Кейт эхлээд хааны гэр бүлд амархан нэгдэж чадав. Хаан ширээ залгамжлагч Уильямтай хуримлаад жил гаруйхан болж байгаа ч Миддлтон Чарльз жононгийн эхнэр Камиллатай найзалж амжлаа. Тэр хоёр найз бүсгүйчүүд шиг л бутикаар орцгоож, дэгжин кафенд кофе ууж суугаа харагдана. Хадам аав нь хүүгийнхээ хамт Кейтийг гэртээ урих дуртай. Жононгийн буяны үйлст нь шинэ гүнж дуртайяа тусална. Хатан хаан түүнийг дангаар нь урьж хамт цай ууна. Норфолкийн Сандрингем гэх ангийн отогт болдог хааны гэр бүлийн ан авд Кейт оролцож, сайн мэргэн бууч гэдгээ харуулан гургалдай агначихна. Харин Диана ийм анд дургүй бөгөөд “цуст спорт” гэж нэрлэдэг байсан нь эрхэм дээдэст төдийлөн таалагдаагүй юм. Дианагийн тээр шаагаад байдаг албан ёсны арга хэмжээнүүдийг Кейт ад үзэхгүй. Шинэхэн герцогийн ахайтан протоколын журмыг чанд мөрдөн хэрэгтэй газар нь мэхийн ёслоод л явж байдаг.
Шинэ орчинд хурдан дасаж, хааны гэр бүлийн уур амьсгалд хэдийнэ орсныг нь ордны ёс зүйн сайн багштай байсных гэхээр. “Миний нөхөр Уильям миний шилдэг багш болсон” гэхэд Миддлтон хүлээн зөвшөөрсөн юм. Кейтийг зөвхөн ордонд л ингэж хүлээн авдаг юм биш. Англсид дэх гэртээ эсвэл нөхрийнхөө алба хаадаг Хаантны цэргийн баазад буюу хадам эцгийнх нь заавраар 2011 оноос нөхрийн хамт сууж байгаа Кенгсингтоны ордны цогцолборын дэвсгэр дэх Ноттингем гэх даруухан коттежид амьдарч байхдаа Кейт ердийн нэг англи гэрийн эзэгтэйн адил дэглэмтэй. Кейтийн энэ ардчилал нь британичуудад таалагддаг. Тэр өөрөө дэлгүүр, хоршоогоор орж, авсан зүйлээ энгийн цаасан ууттай зөөж яваа харагдана. Ард нь хоёр бие хамгаалагч мэдэгдэхгүй гэсэн байдалтайгаар дагаж явдаг нь үнэн л дээ. Тэр гэрийн тогооч авахаас шууд татгалзсан. Гэрт нь нэг үйлчлэгч ирээд долоо хоногт хоёр удаа цэвэрлэгээ хийнэ. Өөр илүү дутуу зүйл огт үгүй.
Англсид тэд жижиг коттеж хөлслөн амьдарна. Нөхрийгөө албандаа явахаас нь өмнө өглөөний хоолыг нь Кейт өөрөө хийж өгдөг. Саяхан нөхрийнхөө 30 насны ойгоор тэр эртлэн босч загас амтлан шараад тэр дэгжин хоолоо оронд нь зөөн өгч сюрприз барьжээ. Кейт 178 см-ийн өндөртөө 54 кг гэсэн үлгэрлэг жинтэй байсан нь бага зэргээр нэмэгдсэн учир хоол ундны өөр дэглэм барих болжээ. Нөхөр нь ч эхнэрээ дагаад биеэ тордоод эхэлсэн сурагтай. Гэхдээ Кейт өөрөө амттай хоол хийх дуртай. Тусгай аргаар шарсан тахиа хуруу долоом амттай гэнэ. Канадад айлчлах үеэрээ цаг гаргаад хоёр гурван франц хоол хийхийг заалгаад авсан байв. Лазанью хийхдээ гарамгай. Саяхан нөхрөөрөө гэрийн нөхцөлд зайдас шахах төхөөрөмж авахуулаад нөхрийгөө дуртай хоолоор нь дайлах болсон гэнэ. Герцогийн ахайтан гүзээлзгэний чанамал, чавганы компотыг өөрийн гараар бэлтгэн савлаад зул сараар титэмт хамаатнууддаа бэлэглэж тэднийг баярлуулсан байлаа.
Миддлтон герцогийн цолтой жирийн нэг гэрийн эзэгтэй байсан бол британичуудын анхаарлыг ингэж татах нь юу л бол. Тэр нэгэн цагт хатан хаан болох ирээдүйтэй хүн гэдэг нь л бүхнээс сонин байгаа хэрэг. Гэрийн эзэгтэйн ажлыг амжуулаад, өөрийн хайртай кокер спаниэль нохойгоо зугаалуулж явахдаа ч спорт зааланд очихдоо ч Миддлтон ясны гүнж шиг харагдаж чаддаг. Гэрийн спортын төхөөрөмж нь 15 фунтээс илүү үнэгүй ч түүний өмссөн биеийн тамирийн хувцас нь олны дунд шууд л моодны хамгийн дэгжин загварт тооцогдоод эхэлдэг.
Өөрийн ямар ч гоёлоо хит болгож чаддаг түүний авъяасыг Британид «Кейт-эффект» гэж нэрлэх болжээ. Уимблдоны тэмцээнд гоёсон гоёлынх нь хэдэн зуун хувилбар он-лайнаар 30 минутын дотор зарагдсан байв. Сүй тавихдаа өмссөн хямдхан цэнхэр даашинзны нь нөөц нэг өдрийн дотор зарагджээ. Хуримын үеэр дээгүүр задгай даашинз дээр нөмөрсөн цагаан болеро нь сүйт эмэгтэйчүүдийн моодны шинэ трэнд болж чадав. Кейт хүрэн харандаагаар хөмсгөө тодруулдгийг эмэгтэйчүүд анзаарсны дараа тийм харандааны арилжаа зургаа дахин нэмэгдсэн гэдэг. Үсчин, гоо сайхны салонд “Кейт шиг” үсээ янзлуулж, “Миддлтон шиг маникюр” хийлгэх гэсэн бүсгүйчүүдийн дараалал тасраагүй… Герцогийн хатагтай шинжээчдийн нэрлэдгээр зүгээр нэг «трендсеттер» болоогүй харин Британийн эдийн засгийн зүтгүүр болсон гэхэд алдахгүй. Үүнд хэтрүүлэг байхгүй, «Кейт-эффект»-ийн моодны аж үйлдвэрлэлд үзүүлэх нөлөөг их ч үгүй, бага ч үгүй “Нэг тэрбум фунт стерлингээр” үнэлж байгаа!
Ийм арвич хямагч бүсгүй хамгийн нэртэй компаниудын трэндээр гоёод байдаггүй. Хямд хувцасандаа маш дэгжин харагддаг нь олны үлгэр болно. Үүнийх нь төлөө хямд хувцас үйлдвэрлэгч нар түүнд онцгой талархан баярладаг. Хатан хааны хаан ширээнд суусан ойгоор Кейт шиг 150 фунтын үнэтэй даашинзаар гоёсон хүн харагдаагүй. Темза гол дээр хийгдсэн усан онгоцны парад дээр тэр хатан хааны хамт улаан даашинзтай явж байв. Сүүлд нь мэдснээр үнэ хямдруулсан худалдаанаас түүнийг авсан байжээ… Титэмт хамаатнуудынхаа хамт Хувилгаан Петрийн сүмийн мөргөлд ирэхдээ сувдтай “очир алмазан” ээмэгтэй байсан нь дөнгөж 48 фунтын үнэтэй ердийн нэг бижутери байсан болж таарав. Гүнж аривлан хэмнэх бас нэг аргыг хатан хаанаас авсан байгаа. Хатан хаан өөрийн ихэнх гоёлоо “наад зах нь” хоёр дахин өмсөөд олонд харагддаг. Уильяамтай сүй тавихад өмсөж байсан дуртай даашинзаараа Кейт дараа нь хоёр ч удаа гоёод олон нийтийн арга хэмжээнд ирсэн байлаа.
Хичнээн аривлан хямгадаад ч Кейтын гоёлууд ихээхэн зарлага шаардах нь мэдээж. Жонон Уильямын цэргийн албан хаагчийн цалингийн орлого жилдээ 50 мянга орчим фунт болохоор эхнэрээ гоёод байхад нь хүрэлцээгүй. Энэ жил Уильям 30 насныхаа ойгоороо леди Дианагийн гэрээслэлийн дагуу 10 сая фунт авсан ч гэр бүлийн зөвлөлгөөн дээр Кейтын тооцоог арай өндөр ашигтай хадам аав нь хийж байхаар болжээ. Чарльз гар таталгүйгээр бэрийнхээ гоёлд мөнгө өгнө. Зөвхөн сүүлийн хагас жилд 35 мянган фунтыг бэрийнхээ гоёлд хадам нь зарцуулсан гэдэг. Хадам нь тэдний одоо орж буй арай том хэмжээний байрны засварт бараг сая фунтыг өгснийг нэмээд хэлье. Хааны гэр бүлийнхэн үзэсгэлэнтэй, дэгжин, эелдэг зантай бэртэй болсондоо, ордонд тайван амгалан таатай уур амьсгал Кейтыг дагаад ирсэн учраас хааны гэр бүлийнхэн бэрдээ зарлагадахдаа гар татахгүй байгаа.
Эх сурвалж: "NEWS WEEK" сонин №021