Хаврын хурц, цоглог наранд усан оргилуурын ус бөнжигнөн гялал­зан цацраад, саяхан усалсан хөрс­нөөс чийглэг үнэр сэнгэнэж, таримал модод гөлөглөж, нялх бул­барайхан ногоон найлзуур бултайгаад … Сайхан аа.

Хүүхэд байхдаа гудамж услаж яваа машинтай тааралдвал бөөн баяр хөөр болдог сон. Сүрэг болж­­мор шиг дагаж гүйлдээд л. Нарны цацраг солонгоруулан цацарч байгаа ус руу хараахан гүй­гээд орчихож бас зүрхлэхгүй ээ. Заримдаа жолооч ах бяцхан тогл­оом хийж жижиг шланкаар үс шүр­шихэд хөөрч баясч, инээлдэж, хашгиралдаж, худлаа дэр дэрхийн зугатааж гүйлдээд л бөөн баяр. Шинэхэн босч байсан өнөөгийн III, IV хорооллын голыг замыг зүлэг­жүүлэх гэж ингэж усладаг байсан юм. Тэнд мөн ч олон удаа субботник хийж мод тарьж. Харам­сал­тай одоо ч гэсэн нүд баясгах мод бут байхгүй шиг л санагдах юм.

Алсад Богд уул дүнхийж, харин шороон манан суунаглана. Нийслэлийн хойд хэсэг нүцгэн уулстай айлсах бүр даваад талийж байгаа гэр хорооллын дээгүүр бүр түймрийн утаа мэт шороон манан нүүгэлтэнэ. Шороотой, түйрэнтэй Монголын намар. Санаагаар бол­дог сон бол хэдхэн ч дусал бол­тугай бороо дуслаасай, шороо анир­лаасай гэж тэсгэл алдан хүснэ. Ойр мөддөө бороо орно ч гэж юу байх вэ дээ. Тэр тусмаа ХХI зуунд, Монголын нийслэлд бороо мөрөөдөж суух ч бас гэнэн, тэнэг ч юм шиг.

Хавар хаварт нийслэлийн улиас­­нууд­ын мөчрийг огтолдог ажил­даа ТҮК-/Тохижилт үйлчил­гээний компани/-ийнхэн гарчээ. Моддыг залуужуулдаг энэ тэр гээд л мөчир тайрахын онцгой ач холбог­длыг баахан тайлбарладаг л юм. Гэвч нүд баясгах ногоон өнгө багатай нийслэлд маань мөчир ч огтлох тийм ч аятайхан санагд­даг­гүй юм. Зэгэл саарал тоосон­цор дунд сэглийх мөчрөө тайруулсан мод, ТҮК-ийн ажилчид газар хөглөрөх мөчрүүд дээгүүр шажиг­натал гишгих нь уйтай.
Уйтгартай зэгэл өнгөөр сүүмэл­зэх моддыг хараад жаахан чийглээд өгвөл бяцхан нахиа нь ургана даа л гэж бодогдоод байх юм. Хотынхон хэзээ мод, зүлгээ усалж эхлэх бол. Төсөр­хөн хотын дарга “Субботник хийгээд” гэчихсэн амьсгаадаж явсан. Хогноосоо ч нэг юм салж л байх шиг байна.  Одоо зүлгээ жаахан чийглээд өгвөл мөн гоё оо. Хотын дарга аа, та ч гэсэн хотын гудамж­аар чийг ханхлан, модод найл­зуураа дэлгэн гунхалзаж байхыг харахыг хүсч байгаа биз дээ.   Хотын даргыг хүлээгээд байх ч юу байхав дээ, албан байгууллага бүр ойр орчныхоо зүлэг модыг услаад эхлэхэд ч болох л юм байна. Маргааш өглөө гудамжаар алхахад усны машин ус цацруулан шүршиж, хөрснөөс чийглэг үнэр үнэртэн, модод баярлан гунхалзаж, зүлэг ногоо урин хавартай уралдан ургах гэж өндийж байгаасай.