Технологийн салбарын хоёр том компани болох Intel, IBM компаниудын ашиг алдагдалтай гарчээ. Энэ жилийн эхний хагасын гүйцэтгэлээр Intel компанийн нийт ашиг 2 тэрбум ам.доллараар хэмжигдэж байгаа нь өнгөрсөн жилийнхээс 29 хувиар буурсан үзүүлэлт болсон юм. Харин IBM компанийн энэ жилийн эхний хагасын ашиг 3 гаруй тэрбум ам.доллар байгаа нь өнгөрсөн жилийнхээс 17 хувиар буурчээ.

Хөрөнгийн зах зээлд ч тэдний хувьцаа буурсан үзүүлэлттэй гарсан аж. IBM компанийн хувьцаа гурван хувиар, Intel компанийн хувьцаа таван хувиар унасан байна. Ажиглагчид Intel компани энэ жилийн сүүлийн хагаст ч алдагдалтай ажиллах бөгөөд энэ нь сүүлийн найман жилийн туршид үзүүлж байгаагүй хар жил болно гэж таамаглаж байгаа юм. Мөн IBM-ыг ч энэ жил алдагдалаа нөхөж чадахгүй гэж дүгнэсэн байна. IBM-ын хувьд энэ жилд 3300 гаруй ажилтнаа цомхотголд оруулах шийдвэр гаргаад байгаа билээ. Энэ жилийн хувьд персональ компютерийн борлуулалт дэлхий даяар тун тааруу байсан нь хоёр том компанийн борлуулалтад нөлөөлсөн ажээ.