Нийслэлийн Сонгинохайрхан дүүргийн МАХН-ын Хяналт, ёс зүйн дэд хорооноос намынхаа генсек Г.Шийлэгдамбад хариуцлага тооцно хэмээн мэдэгдэв.

Тус намын “толгой бохирдсон” юм байх. Тиймээс дэд дарга, генсек нараа ойлгомжгүй, тогтворгүй байдал үүсгээд байна. Нэгэн дүүргийн намын хороо нь л гэхэд дотроо хоёр хуваагдчихаад байна хэмээн тэд ярьжээ. Ийнхүү бухимдах болсон шалтгаан нь Сонгинохайрхан дүүргийн Мянгатын хорооны дарга н.Мөнгөнчимэгийг намаас хөөх шийдвэр гаргасантай холбоотой гэнэ. Үүний өмнө МАН-аас МАХН-д элсэн орсон, Байгаль орчны сайд асан У.Барсболдыг хөөснөөс болж яг ийм асуудал гарч байсан. Тухайн үед У.Барсболдыг МАХН-ын Гүйцэтгэх товчоо нь намын нарийн бичгийн даргаас огцруулах шийдвэр гаргасан ч “хөөгдөгч этгээд” болохоор “Би Сонгинохайрхан дүүргийн 19 дүгээр зуутын гишүүн. Намайг нарийн бичгийн даргаас чөлөөлөх эрх Гүйцэтгэх товчоонд байхгүй” хэмээн ярьж байв. Тэр ч байтугай УИХ-ын нэр бүхий гишүүнээр толгойлуулсан тус намын зарим нөхөд шөнийн цагаар хувийн бааранд нь тагнаж явсан гэсэн. Энэ мэтчлэн Г.Шийлэгдамба генсек МАХН-ыг аятайхан аваад явах эвээ нэг л олохгүй байгаа бололтой. Тэгэхээр зарим гишүүний санал болгоод байгаачлан хурлаа яаралтай зарлах цаг нь болсон бололтой. Магадгүй намын даргаа “наранд” гараад ирэхэд нь гишүүдийг нь тараачихсан байх ч юм билүү.