Мьянмарын Ерөнхийлөгч Тейн Сейн Их Британид хоёр өдрийн айлчлал хийхээр тус улсад саатаад байгаа. Түүний айлчлал Их Британид хийж буй анхны албан ёсны айлчлал  бөгөөд  Ерөнхий сайд Дэвид Камерон өчигдөр түүүнийг хүлээн авч уулзсан байна. Харин Ерөнхийлөгч Тейн Сейн Их Британийн Ерөнхий сайдтай уулзсаныхаа дараа Лондон хотноо тавьсан илтгэлийнхээ үеэр Мьянмар улс энэ оны сүүл гэхэд улс төрийн бүх хоригдлуудаа суллах болно гэдгээ албан ёсоор мэдэгджээ.

Түүнчлэн тэрээр 2010 оны гуравдугаар сараас Засгийн газарт орон ажиллах үеэс эхлэн Мьянмар олон зуун улс төрийн хоригдлуудыг сулласныг онцолж, “Энэ бол тус улсын улс төрийн шинэчлэлийн нэгээхэн хэсэг” хэмээн мэдэгджээ. Ерөнхийлөгч Тейн Сейний мэдэгдсэнээр бол Мьянмарт улс төрийн хоригдлуудыг суллах тусгай хороо байгуулагдаж, хоригдлуудын хэрэг тус бүрийг шалгаж байгаа юм байна.

Мьянмарын Ерөнхийлөгч Их Британид хийж буй уг айлчлалаар худалдаа, зэвсэгт хүчнээс гадна эдийн засаг тэр дундаа гадаадын хөрөнгө оруулалтын тухай гээд хэд хэдэн асуудлыг онцолж байгаа аж.