Спортын 11 төрлөөр зохиогдож буй Монголын оюутны спортын X “Универсиад” наадмын жүдо бөхийн тэмцээн өнөөдөр Спортын төв ордны Б зааланд эхэллээ. Тэмцээнд ШУТИС, МУБИС, МУИС, ХААИС тэргүүтэй 21 их, дээд сургуулийн эмэгтэй 60, эрэгтэй 150, нийт 210 гаруй тамирчин эрэгтэй, эмэгтэй тус бүр долоон жинд зодоглож байна. Тэмцээний эхний өдөр буюу өнөөдөр хөнгөн жингийн, тодруулбал, эрэгтэйчүүдийн 60, 66, 73 кг, эмэгтэйчүүдийн 48, 52, 57, 63 кг-ын жингийн барилдаан болж, аваргууд тодорно. Харин маргааш үлдсэн жинд “Универсиад”-ын шилдгүүд тодрох юм.

Тэмцээнд амжилтаараа илүүрхсэн оюутан жүдочид ирэх наймдугаар сард БНХАУ-ын Шинжинь хотноо болох дэлхийн оюутны спортын 26 дугаар “Универсиад” наадамд эх орноо төлөөлнө.