Хамгийн олон үзэгч, фанаттай Английн хөлбөмбөгийн Премьер лигийн 33 дугаар тойргийн сүүлийн хоёр тоглолт өчигдөр болж, лигийн хүснэгтийн тэргүүн байруудыг эзэлж байгаа багуудын эгнээнд өөрчлөлт орлоо. “Тоттенхэм” талбайдаа хотын өрсөлдөгч “Арсенал”-ыг хүлээн авч, 3:3 харьцаатай тэнцсэн бол “Челси” талбайдаа “Бирмингэм”-ийг буулган авснаар хүснэгтийн хоёрдугаар байр руу ахилаа.

“Уайт Харт Лейн” цэнгэлдэхэд болсон тоглолтын эхний хагас өндөрлөхөөс таван минутын өмнө “Арсенал” 3:1-ээр тоглолтыг хошуучилж байсан ч хоёрдугаар хагас эхэлсний дараа Том Хаддлстоун, Рафаэль ван дер Ваарт нар гоолдсоноор тооны харьцааг тэнцүүлжээ. Харин энэ үеэр Лондонгийн “Цэнхрүүд” талбайдаа “Бирмингэм”-ийг 3:1 харьцаатай хожсоноор гоолын зөрүүгээр “Арсенал”-ын өмнө, хүснэгтийн хоёрдугаар эгнээг эзлэх болов. Гэхдээ өмнөх өдөр нь “Ньюкасл”-тай хуурай тэнцсэн “Манчестер Юнайтед” зургаан онооны давуутай лигийг тэргүүлж байна. Сэр Алекс Фергусоны баг хэдийгээр тэргүүлэгчийн байрт байгаа ч ирэх сарын 1-нд “Арсенал”-ын талбайд, дараа долоо хоногт нь “Челси”-г талбайдаа хүлээн авах учир хүндхэн тулаанууд хүлээж буй. Лондонгийн угсаатнуудын хувьд ч ялгаагүй бэрх давааг давна. Тэд энэ сарын 30-нд буюу ирэх бямба гаригт талбайдаа “Тоттенхэм”-ийг хүлээн авах учиртай. Харин Франц мэргэжилтэн Арсень Венгерээр удирдуулсан “Их буучид” лигийн сүүлийн зургаан тоглолтоос таван тэнцээ аваад байгаа. Тэд дараагийн тойрогт “Болтон”-гийн талбайд, түүний дараа “МанЮ”-г талбайдаа хүлээн авч, тоглоно.