Энэ сарын зургааны өдөр Нобелийн шагналт, Дээрхийн гэгээнтэн ХIV Далай лам Данзанжамцын 78 насны төрсөн өдөр тохиох аж. Далай ламын төрсөн өдрийг тохиолдуулан TMBCC буюу Түвд, Монголын Буддист Соёлын төвөөс олон арга хэмжээнүүдийг зохион байгуулахаар төлөвлөж байгаа юм байна. Далай ламын төрсөн өдөрт зориулсан арга хэмжээний нээлт ирэх бямба гаригт Энэтхэгийн “Bylakuppe”-т орон нутгийн цагаар өглөөний 10:00 цагт эхлэх аж. “Bylakuppe” нь Энэтхэг улс дахь Түвд оршин суугчид ихтэй жижиг хотуудын нэг гэдгээрээ алдартай бөгөөд уг арга хэмжээний үеэр бүх мөргөл, залбирал Түвд хэлээр явагдаж сүсэгтэн олонд цай болоод чихэртэй цагаан будаагаар үйлчлэнэ хэмээн Далай ламын албан ёсны цахим хуудсанд мэдээлжээ.

Түүнчлэн Далай ламын төрсөн өдөрт зориулсан арга хэмжээнүүд Энэтхэгээс гадна Английн Лондон, Америкийн Лос-Анжелос, Калифорнид мөн энэ сарын таван, зургаанд зохион байгуулагдах аж. Европын хуанлигаар тэмдэглэдэг цорын ганц Буддын баяр нь XIV Далай ламын төрсөн өдөр юм. Буддистууд дээрхийн гэгээнтэн Далай ламыг Энэрэнгүйн Будда Авалокитешварагийн (Жанрайсаг) дүр гэдэг бөгөөд Далай ламын төрсөн өдрийг Түвдийн бурхны сүсэгтэн олон тэмдэглэдэг төдийгүй энэ өдөр буддын сүм хийдэд хурал ном хуран Далай багшдаа эрүүл энхийг хүсэн ерөөдөг байна.

Дээрхийн гэгээн XIV Далай лам нь Түвдийн болон Түвдийн иргэншлийн бүс Монгол, Буриад, Тува, Халимаг, Бутан, Балба зэрэг орнуудын бурхны шашны лидер. Тэрбээр 1935 оны долдугаар сарын 6-нд Түвдийн зүүн хойд хэсгийн Амдо мужийн Тагцэр гэх жижиг тосгоны тариачин гэр бүлд өмнөх XIII Далай лам нас барснаас хойш хоёр жилийн дараа төржээ. Есөн хүүхэдтэй айлын тав дахь хүү нь Далай лам байсан ба төрөөд Лхам Донров гэх нэр авч байжээ. 1937 онд Далай ламын хойд дүрийг тодруулах эрлийнхэн түүний гэрт очин шалгаад XIII Далай ламын болоод өмнөх 13 гэгээнтний хойд дүр хэмээн тодруулсан байна. Шинэ Далай ламын төрсөн нутаг нь тэр үед Хятадын хяналтад байсан ба Түвдийн засаг захиргаа орон нутгийн эрх баригчидтай гэрээ хэлэлцээр хийж байгаад түүнийг 1939 оны аравдугаар сард Патолод авч ирж, 1940 оны хоёрдугаар сарын 22-нд Далай ламын сэнтийд залжээ.