УИХ-ын чуулганы хуралдаанаар Газрын тосны тухай хууль зэрэг хэд хэдэн хуулийн төслийг хэлэлцэх эсэхийг хэлэлцлээ. Тодруулбал, Газрын тосны тухай хуулийн шинэчилсэн найруулгын төсөл, Газрын тосны тухай хуулийг дагаж мөрдөх журмын тухай, Газрын тосны тухай хууль хүчингүй болсонд тооцох тухай, Монгол Улсын төсвийн тухай хуульд нэмэлт оруулах тухай, Аж ахуйн үйл ажиллагааны тусгай зөвшөөрлийн тухай хуульд нэмэлт, өөрчлөлт оруулах тухай, Улсын нөөцийн тухай хуульд нэмэлт оруулах тухай, Татварын ерөнхий хуульд хуульд нэмэлт оруулах тухай, Гаалийн тариф, гаалийн татварын тухай хуульд нэмэлт оруулах тухай, Нэмэгдсэн өртгийн албан татварын тухай хуульд нэмэлт оруулах тухай, Аж ахуйн нэгжийн орлогын албан татварын тухай хуульд өөрчлөлт оруулах тухай, Засгийн газрын тусгай сангийн тухай хуульд нэмэлт оруулах тухай, Төрийн аудитын тухай хуульд нэмэлт, өөрчлөлт оруулах тухай олон хуулийн төслүүдийг хэлэлцэх эсэхийг нь хэлэлцэн, дэмжлээ.

УИХ-ын гишүүн Ц.Нямдорж "Одоогийн хууль нь 1990-ээд оны хууль. Түүнээс хойш энэ хуулийг өөрчлөх талаар яригдаж байгаа ч орж ирэхгүй байна. Тиймээс энэ хуулийг хэлэлцэх нь зүйтэй гэж үзэж байна. Мөн Занарын талаар сүүлийн үед маш их яригдаж байгаа. Тиймээс энэ Занарын талаар Газрын тосны тухай хуультай холбох боломж, бололцоо байгаа эсэхийг судлах нь зүйтэй" гэсэн саналыг дэвшүүллээ.

УИХ-ын гишүүн Д.Зоригт "Энэ хуулийг Засгийн газраас оруулж ирж байгаа нь сайшаалтай байна. Үүнийг Эдийн засгийн байнгын хорооноос ажлын хэсэг гарган ажиллах, дахин судлах хэд хэдэн хуулийн төсөл байна. Тухайлбал, Нэг аж ахуй нэгж 21 орчим татвар төлдөг. Дээрээс нь нэмээд энэ хуулиар есөн төрлийн татвар төлөхөөр байна. Ойролцоогоор 30 орчим татвар төлөхөөр байна. Энэ бол аж ахуй нэгжүүдэд хүндрэлтэй гэж үзэж байгаа. Мөн гэрээний нөхцөл биелүүлээгүй бол тодорхой хариуцлага тооцдог байх гэх мэтийн өөрчлөлт оруулах, Мөн төр өөрийн зардлаар хайгуул хийх гэж тусгасан байна. Үүний оронд төр зохицуулалт, хяналтын үүргээ биелүүлж ажиллах нь зүйтэй. Ажлын хэсэг дээр улам сайжруулах арга, боломж байгаа эсэхийг ярилцах шаардлагатай" гэв.

Үүний дараа байнгын хорооны санал дүгнэлтээр дээрхи төслүүдийг хэлэлцэх эсэхээр санал хурааж 89,7 хувийн саналаар дэмжиж, анхны хэлэлцүүлэгт бэлдүүлэхээр Эдийн засгийн байнгын хороонд шилжүүллээ.

Одоо чуулганы хуралдаанаар Үндэсний их баяр наадмын тухай хуульд нэмэлт, өөрчлөлт оруулах тухай хуулийн төслийг хэлэлцэх эсэхийг хэлэлцэж байна.