Баянгол дүүргийн нутаг дэвсгэрт хоёр хоногийн өмнө буюу энэ сарын 1-2-нд шилжих шөнө хүн амины ноцтой хэрэг гарч, 25-30 насны эмэгтэй хүний цогцос олдсон тухай бид мэдээлсэн билээ. Хэргийн талаар албан бус эх сурвалж “Талийгаач татварын байцаагч бүсгүй байсан. Ажил албатай нь холбоотойгоор түүнийг сүүлийн үед дарамталж, сүрдүүлэх болсон гэсэн. Дарамталж байсан хүмүүс түүний амь насыг хохироосон байж болзошгүй” гэсэн мэдээлэл өглөө.

Харин уг мэдээллийг Татварын ерөнхий газрын албаны эх сурвалжаас тодруулахад “Талийгаач нь Чингэлтэй дүүргийн татварын хэлтсийн хяналтын байцаагчаар ажилладаг байсан. Манай байгууллагад өөр ямар нэгэн мэдээлэл алга. Ажил, албатай нь холбоотойгоор амь насанд нь халдсан эсэхийг цагдаагийн байгууллага шалгаж тогтоох байх” гэлээ.

Эмэгтэйг 40 орчим удаа хутгалж, онц хэрцгийгээр хөнөөсөн юм. Аймшигт хэрэг үйлдсэн гэмт этгээдийг Баянгол дүүргийн цагдаагийн нэгдүгээр хэлтсээс эрэн сурвалжилж, хэргийг үргэлжлүүлэн шалгаж байна.