“Hi Fi Records” хөгжмийн сүлжээ дэлгүүрээс долоо хоног тутамд гаргадаг шилдэг борлуулалттай цомгийн жагсаалтыг “Никитон”-ы “Үүлэн үүст” эргэн тэргүүллээ. Өмнөх долоо хоногт уг жагсаалтыг FM 98.5-ээс гаргасан “2012 оны шилдэг 20 дуу” цомог тэргүүлсэн бол энэ удаад “худалдаанд гарсан цагаасаа жагсаалтын нэгдүгээр байрыг эзлэн залуусыг зуны турш уяраагаад буй “Үүлэн үст” дахин тэргүүлжээ. Орчлон ертөнцийг гоо үзэсгэлэнгээрээ чимж буй бүх бүсгүйчүүддээ “Никитон” хамтлагийн зүгээс барьж буй “Үүлэн үст” цомог ийнхүү зургаа дахь долоо хоногтоо шилдгээр шалгарлаа. Уг жагсаалтын хоёрт Төрийн хошой шагналт, Ардын жүжигчин, хөгжмийн зохиолч Н.Жанцанноровын “Бурхан Халдун” цомог оржээ. Харин 11 долоо хоногийн турш шилдэг цомгоор шалгарч, хөгжим сонирхогчдын дунд дөрвөн сарын турш “хит” байсаар байгаа “Ертөнц” цомог энэ удаад жагсаалтын гуравдугаарт бичигджээ. Сонирхуулахад, “Брос Рекордс”-ын тэнгэрийн өнгөтэй “Ертөнц” цомог тун удахгүй тайзан дээрээс эгшиглэнэ гэсэн шүү. Ирэх долдугаар сарын 5-наас наймдугаар сарын 19-нийг хүртэл Монголын Хүүхдийн ордны бэсрэг танхимд тоглогдох “Universe Live” тоглолтын бэлтгэл ажил хэдийнэ эхэлчихээд байгаа бөгөөд шилдэг хөгжимчид ертөнцийн анирыг танд сонордуулна гэсэн шүү.  

Түүнчлэн “Хурд” хамтлагийн гиатрчин Д.Отгонбаярын өнгөрсөн жил тайзнаа анх удаа тоглосон “Чи минь байгаа болохоор” бие даасан тоглолтын DVD борлуулалтаараа тэргүүлэн шилдэг аравт багтжээ.

Өнгөрсөн долоо хоногт борлуулалтаараа тэргүүлсэн ТОП-10 цомгийн жагсаалтыг хүргэе.

№	Хамтлаг/Дуучин	Цомгийн нэр	Үнэ
1	Никитон	Үүлэн үст	55000
2	Жанцанноров	Бурхан халдун	23000
3	Онон	Ертөнц	20000
4	A Sound	Зуун наст	12000
5	Хурд Отгонбаяр	Чи минь байгаа болохоор DVD	30000
6	FM 98.5	2012 оны шилдэг 20 дуу	15000
7	Балхжав	Миний дуунууд 2012	25000
8	Төрмандах	Аархал	20000
9	Никитон	Нандин шүтээн	25000
10	Лхагвасүрэн	Харангын Лхагваа	15000