Хятадын Шинжиан-Уйгурын автономит бүсэд өчигдөр уйгурууд бослого гаргаж, үймээн дэгдээсний улмаас 27 хүн амь үрэгджээ. Хохирогчдын ес нь цагдаа, найм нь энгийн иргэн байсан ба цагдаа нарын суманд 10 босогч амь үрэгдсэн байна. Түүнчлэн гурван хүн гэмтэж бэртэн эмнэлэгт хүргэгджээ. Хятадын Синьхуа агентлагт мэдээлснээр Шинжиан-Уйгурын Турфан хотоос холгүй орших Луккун гацаанд уйгур хүмүүс бослого гаргаж, үймээн дэгдээсэн байна. Бослого гаргагчдын зүгээс ирт мэсээр зэвсэглэн цагдаагийн газар, захиргааны барилгууд руу дайрсан бөгөөд Хятадын цагдаа нар тэдний эсрэг гал нээсэн аж.

Луккун гацаа нь Шинжиан-Уйгурын нийслэл Урумчи хотоос зүүн өмнөд зүгт ойролцоогоор 200 км-ийн зайтай оршдог аж.

Үүнээс өмнө өнгөрсөн дөрөвдүгээр сард Шинжиан-Уйгурын Кашгар хотод уйгурууд бослого гаргасны улмаас 21 хүн амь үрэгдсэн байна.

Хятадын харъяа Шинжиан Уйгарын өөртөө засах оронд энэ мэт бослого үймээн гарах нь элбэг бөгөөд Уйгур үндэстнүүд болон Хятадуудын хооронд байнга зөрчил мөргөлдөөн гардаг байна. Уйгаруудын зүгээс өөрсдийн хэл соёл, бүс нутгийн хараат бус байдлын төлөө тэмцсээр байгаа юм. Харин Хятадын удирдагчид газрын тос, байгалийн хийн арвин нөөцтэй Шинжиан-Уйгарын бүс нутаг дахь хяналтаа алдахгүй байхыг эрмэлздэг байна. Түүнчлэн тус бүс нутагт нүүрсний чамгүй нөөц илрээд байгаа ба Хятадын зүгээс удахгүй олборлолт явуулахаар төлөвлөж байгаа гэнэ.