Монголын спортын сэтгүүлчдийн холбооны чуулган өчигдөр хуралдлаа. “Олимпик хаус”-т болсон тус чуулганд МССХ-нд гишүүнчлэлтэй 70 гаруй гишүүн оролцож, ирэх дөрвөн жилд тус холбоог удирдах эрхмүүдийг сонгон баталжээ. Мөн чуулганаар МССХ-ны ажлын тайланг хэлэлцэж, холбооны дүрэмдээ өөрчлөлт оруулсан байна.

Өнгөрсөн найман жилийн хугацаанд тус холбоог удирдсан Ж.Отгонцагаан ажлаа хүлээлгэн өгч, гишүүдийн санал хураалтаар Ч.Отгонбаатар холбооны шинэ ерөнхийлөгчөөр сонгогджээ. Тэрбээр 46 сэтгүүлчийн санал авсан бол түүнтэй өрсөлдсөн Г.Идэр-Ууган 15 хүний дэмжлэг хүлээсэн байна. Мөн тус хурлаас өмнө нь МССХ-ны Ерөнхий нарийн бичгийн даргаар ажиллаж байсан Б.Цагаанбаатарыг дэд ерөнхийлөгчөөр томилсон байна. Түүний хамт П.Баярмагнай МССХ-ны дэд ерөнхийлөгчөөр ажиллах ажээ. Харин Б.Бадамгарав /News.mn/-ыг МССХ-ны генсекээр томиллоо.

Мөн чуулганаар холбооны Удирдах зөвлөлийн гишүүдийг шинэчлэн томилсон байна. Ингэснээр Р.Манлай /Таван цагариг/, Ц.Галбадрах /Улаанбаатар/, Б.Хосбаяр /Спортын цонх/, И.Отгонбаатар /NTV/, Д.Батжаргал /МҮОНТ/, Ч.Ганбат /Хасу Бөх/ нар Удирдах зөвлөлд ажиллахаар болжээ.