Монголын олимпийн боксын холбооны хоёрдугаар шигшээ багийнхан Ардын багш Д.Банди, дасгалжуулагч Д.Батсүрэн нарын удирдлага дор Европын цуврал тэмцээнд оролцоод өчигдөр нутагтаа иржээ. Тэдний сүүлийн тэмцээн нь энэ сарын 11-17-нд Армяны нийслэл Ереван хотноо болсон олон улсын тэмцээн байв. Армяны олимпийн хорооны ерөнхийлөгч Гагик Царукьяны ивээл дор зохион байгуулсан тус тэмцээнд Монголын ширэн бээлийтнүүдээс ОУХМ Ж.Отгонбаяр /52 кг/, З.Энхзориг /60 кг/, Б.Түвшинбат /64 кг/, А.Бат-Очир /69 кг/, Н.Шинэбаяр /75 кг/, Т.Мөнхбаатар /81 кг/, Т.Эрболат /-91 кг/ нар тулалдсанаас 60 кг-ын жинд ОУХМ З.Энхзориг хүрэл медаль, түүнийг дагалдах 2000 ам.долларын эзэн болжээ.

Мөн энэ үеэр боксын нэгдүгээр шигшээ багийнхан “Belgrade Winner-2011” олон улсын тэмцээнд оролцохоор Сербид ирээд байна. Улсын аварга тамирчдаас бүрдсэн нэгдүгээр шигшээ багийнхан Гавьяат дасгалжуулагч Д.Ганзориг, дасгалжуулагч Р.Сайнбилэг нарын удирдлага дор өнөөдрөөс эхлэн 24-нийг дуустал Бельградад тулалдаад эх орондоо ирэх юм.