Зургаадугаар сарын 8-13-нд Тайландын Чангмай хотноо болсон өсвөрийн шатарчдын Зүүн өмнөд Азийн аварга шалгаруулах тэмцээнээс манай тамирчид зургаан медаль хүртсэн байна. Ингэснээр манай өсвөрийн шатарчид багаараа зургаадугаар байрт шалгарсан байна. Харин энэхүү тэмцээнээс 21 алт, 22 мөнгө, 26 хүрэл медаль хүртсэн Вьетнамын баг тамирчид тэргүүн байр эзэлсэн байна. 

Монголын шатрын холбооны Ерөнхий нарийн бичгийн дарга Ц.Батсайханаар ахлуулсан өсвөрийн шилдэг 18 тамирчин өрсөлдөж, нэг алт, дөрвөн мөнгө, нэг хүрэл медаль хүртсэн байна. Тэмцээн 8 хүртэлх нас, 9-10 нас, 11-12 нас, 13-14 нас, 15-16 нас, 17-18 нас, 20 хүртэлх нас, 50-аас дээш насны ахмад гэсэн найман насны 16 ангиллаар блиц /түргэн/, рапид /түргэвчилсэн/, стандарт /сонгодог/ гэсэн гурван төрлөөр явагдсан байна.

Ингээд тэмцээний медальтнуудыг танилцуулъя.  

Рапидын төрөлд:

• 15-16 насны охидын ангилалд Ганбаатарын Сайханзаяа "мөнгө"
• 8 хүртэлх насны хөвгүүдийн ангилалд Ганзоригийн Амартүвшин "мөнгө"

Блицийн төрөлд:

• 15-16 нас охидын ангилалд Ганбаатарын Сайханзаяа "мөнгө"
• 9-10 насны хөвгүүдийн ангилалд CM Эрдэнийн Баасансүрэн "алт"
• 20 хүртэлх насны ангилалд FM Сумъяагийн Билгүүн "хүрэл"

Стандартын төрөлд:

• Найм хүртэлх насны хөвгүүдийн ангилалд Сумъяагийн Чингүүн "мөнгө"

Сонгодог шатрын төрөлд мөнгөн медаль хүртсэн С.Чингүүн ОУШХ-ны дэд мастер цолны болзол биелүүлсэн байна.