Үйлдвэрчний эвлэлүүдийн хол­боо цахилгаан, дулааны үнэд өөрчлөлт орсонтой холбогдуулж өчигдөр байр сууриа илэрхийллээ. Эрчим хүчний зохицуулах газар аж ахуйн нэгжийн цахилгааны үнийг 10,3 хувиар нэмсэн нь хэрэглэгчдийн худалдан авах чадварт нөлөөлж болзошгүй гэж үзжээ. Тариф ирэх сарын 1-ээс эхлэн хэрэгжих бөгөөд талх, гурил, сүүний үнэ өсөх шалтгаан болох вий гэдгээс тэд болгоомжилж байгаа юм. Үйлдвэрчний эвлэ­лийг төлөөлж, МҮЭХ-ны дэд ерөнхийлөгч Х.Амгаланбаатар, Ажилчин албан хаагчдын үйлд­вэрч­ний эвлэлийн хорооны дарга Н.Алтанцэцэг, Төрийн албан хаагчдын үйлдвэрчний эвлэлийн хорооны дарга Б.Батбилэг нар сэтгүүлчдэд мэдээлэл өгсөн юм.
Эрчим хүчний зохицуулах газар өнгөрсөн оны нэгдүгээр сард цахилгааны үнийг 17,35, дулааны үнийг 14,5 хувиар нэмэхэд “Атар” талхны үнэ 10,6 төгрөг, “Алтан тариа” компанийн гурил нэг кг нь 4,6-5,3 төгрөг зэрэг өсөлт гарах тооцоог гаргаж байжээ. Гэвч тухайн үед бодит байдал дээр хүнсний дээрх бүтээгдэхүүний үнэ уг тооцооноос илүүтэйгээр өссөн байна. Тиймээс цахилгаан дулааны үнийн энэ удаагийн өөрчлөлт хэдий бага гэж харагдавч бодит байдал дээр мөн л өмнөх шигээ тооцоолсноос илүүтэйгээр өсөх вий гэж тэд сэрэмжилжээ. Иргэдийн хэрэглэж буй цахилгааны үнэ дөрвөн төгрөгөөр нэмэгдсэн, дээрээс нь өдөр тутмын хэрэглээ болсон талх, гурил, сүүний үнэ өсвөл Эрчим хүчний зохицуулах газраас гаргасан шийдвэр иргэдэд ачаалал авчрах нь дамжиггүй. Хэрвээ өргөн хэрэглээний бараан бүтээгдэхүүний үнэ өсч, иргэдийн нуруун дахь ачаалал ихэсвэл цахилгаан, дулааны үнэд оруулсан өөрчлөлтийг цуцлуулахын төлөө тэмцэнэ гэдгээ мөн тэд хэлж байлаа. Энэ тухай мэдэгдлээ Засгийн газар, Эрчим хүчний зохицуулах газар болон Шударга өрсөлдөөн, хэрэглэгчийн төлөөх газар тус тус хүргүүлнэ гэж байв.
Түүнчлэн Засгийн газар энэ оныг хөдөлмөр эрхлэлтийг дэмжих жил болгон зарласан. Энэ үед эрчим хүчний үнийг нэмсэн нь жижиг дунд үйлдвэрийг сөхрүүлэх, ажлын байрыг цөөрүү­лэх зэрэг олон сөрөг үр дагавар дагуулах магадлалтай гэж үйлд­вэрчний эвлэл үзэж байна. Тиймээс Шударга өрсөлдөөн, хэрэглэгчийн төлөө газар хуулиар олгогдсон эрхийн дагуу үйлдвэрлэгч, бор­луу­лагчид, аж ахуйн нэгж, газ­руудад шударга бусаар үнээ нэмэгдүүлэхгүй байх талаас хяналт тавьж ажиллах шаардлагатай анхаа­руулав.
Энэ талаар зарим хүнсний үйлдвэртэй холбогдож тэдний байр суурийг авсан юм.
“Сүү” ХК-ийн Маркетингийн албаны дарга Б.Алтантуяа: Манай компанийн үнэ нэмэх шийдвэр гараагүй байна. Эдийн засагчид тооцоо хийж үзэж захирлуудад танилцуулна. Ингэхдээ цахилгаан, дулааны үнийн өөрчлөлт бүтээг­дэхүүний үнэд нөлөөлөхүйц хэм­жээ­гээр өсч үү, үгүй юу гэдгийг тэд тогтоох юм. Тэд тооцоо гаргаж дуусаагүй байгаа тул одоогоор албан ёсны хариу өгөх боломжгүй байна гэлээ.
Харин “Алтан та­риа” компанийн ту­хайд цахилгаан, дулаа­ны үнэ өссөнийг буруут­гахгүй байгаа юм. Эрчим хүчний компани алдагдалтай ажил­лаж болохгүй, нэмэх шаардлагатай бай­сан болоод нэмсэн биз хэмээх хариултыг өгсөн. Одоогоор тус компа­ни гурилын үнэд өөрчлөлт оруулах эсэ­хээ хараахан ший­дээ­гүй байна.
Харин цахилгаан, дулааны үнийг нэмэх шийдвэр гаргасан Эрчим хүчний зохицуулах газар дараах тооцоог гаргасан байгаа юм. Тус байгууллага өргөн хэрэглээний бараа бүтээгдэхүүн болох талх, сүү, мах, гурилын үнэд хэрхэн нөлөөлөлхийг харуулах зорилгоор “Талх чихэр”, “Сүү”, “Мах импекс” болон “Алтан тариа” компаниудыг сонгон авч тооцоо хйижээ. Эрчим хүчний зардлын өсөлтөөс эдгээр компаниудын нийт зардал 0,5-1,0 хувиар нэмэгдэхээр тооцоо гарсан байна. Жишээлбэл, “Атар” талхны үнэ 3-4 төгрөг, “Алтан тариа” компанийн нэг кг I зэргийн болон дээд гурилын үнэ 4-6 төгрөгөөр тус тус нэмэгдэх магадлалтай гэжээ.
Юутай ч хөдөлмөрчдийн эрх ашгийг хамгаалах тус байгууллага үүнд хяналт тавьж ажиллахаа ийн мэдэгдлээ.

Б.СҮРЭН /сурвалжлагч/