Монгол Улсын Ерөнхийлөгчийн сонгуулийн тухай хуульд заасны дагуу гадаад орнуудад амьдарч байгаа монгол иргэд саналаа өгч сонгох эрхээ эдлэх боломжтой болсон билээ. Энэ дагуу өнгөрсөн тавдугаар сарын 5-29-нийг дуустал гадаад дахь монголчууд сонгогчийн бүртгэлдээ хамрагдсан. Сонгуулийн ерөнхий хорооноос гаргасан мэдээгээр нийт 6494 сонгогч бүртгэлээ хийлгэсэн байна. Тиймээс гадаад дахь сонгогчдын саналын хуудсыг хэвлэх ажил өнөөдрөөс эхэлж байгаа аж. Саналын хуудсыг таван хувийн нөөцтэй хэвлэх гэнэ. Тодруулж хэлбэл, нийт 6838 саналын хуудас хэвлэж гадаад дахь Монгол Улсын Элчин сайдын яамд руу тус бүр хүргэх аж.

Гадаад орнуудад амьдарч байгаа монгол иргэд ингэхдээ сонгогчийн бүртгэлдээ хамрагдсан иргэд саналаа өгөх эрх нээгдсэн. Тиймээс зургаaдугаар сарын 14-16-ний хооронд тухайн суугаа орныхоо Монголын Элчин сайдын яаманд биеэр хүрэлцэн очиж саналаа өгөх ёстой. Саналын хуудсанд Монгол Улсын Ерөнхийлөгчийн сонгуульд нэр дэвшин өрсөлдөж байгаа гурван нэр дэвшигчийг дарааллын дагуу жагсаан бичсэн байна. Түүнээс сонгогч сонголтоо хийн нэг нэр дэвшигчийг тэмдэглэнэ.

Хуульд зааснаар саналын хуудсанд Ардчилсан намаас Монгол Улсын Ерөнхийлөгчийн сонгуульд нэр дэвшин өрсөлдөж байгаа Ерөнхийлөгч Ц.Элбэгдорж нэгд эрэмбэлэгдэн бичигдэх бол хоёрт МАН-аас нэр дэвшин өрсөлдөж байгаа УИХ-ын гишүүн Б.Бат-Эрдэнэ, гуравт МАХН-аас өрсөлдөж буй Эрүүл мэндийн сайд Н.Удвал нарыг тус тус жагсаан бичих юм байна. Энэ нь УИХ-д авсан суудлынх нь тоогоор нэр дэвшигчийг эрэмбэлж бичихээр Монгол Улсын Ерөнхийлөгчийн сонгуулийн тухай хуульд зааж өгсөнтэй холбоотой аж.

Өмнөх сонгуулиудад нам байгуулагдаж, Улсын Дээд Шүүхэд бүртгэгдсэн он цаг дарааллын дагуу Монгол Улсын Ерөнхийлөгчийн сонгуульд нэр дэвшигчдийг эрэмбэлж бичдэг байсан бол хуульд өөрчлөлт орсноор УИХ-д авсан суудлынхаа тоогоор жагсаан бичихээр болж байна.