“Орландо Мэжик” багийн төвийн тоглогч Двайт Ховард өөрийнхөө гайхамшигтай карьертаа дахин нэг цом нэмлээ. Энэ нь NBA-ээс жил бүр олгодог шилдэг хамгаалан тоглогчийн шагнал бөгөөд энэ шагналыг гурав дахь жилдээ дараалан хүртэх болсныг даваа гаригт зарлажээ. Ховард нийтдээ 585 оноогоор энэхүү шагналын эзэн болсон байна. Спортын 120 сэтгүүлчдээс 114 нь Двайтад нэгдүгээр байрын санал өгчээ. Товчхондоо, тэрбээр оны хамгийн шилдэг хамгаалан тоглогчоор хол тасархай шалгарч байгаа юм. Түүний ард “Бостон”-ы Кевин Гарнетт 77 оноо, “Даллас”-ын Тайсон Чандлер 70 оноогоор удаалжээ.

NBA-ын түүхэнд Дикембе Мутомбо болон Бен Уоллос нар л дээрх шагналыг дөрвөн удаа хүртэж байсан. Ховард ирээдүйд тэднийг ч амжилтаараа давах боломжтой. “Би хамгаалахын тулд өөрт байгаа бүхнээ гаргахыг хичээдэг. Ингэж чадвал тоглолтыг өөрчилдөг, гэхдээ энэ нь зөвхөн блок шот хийнэ гэсэн үг биш” хэмээн Ховард хэлжээ.

Ховард нэг тоглолтод дунджаар 14,1 самбараас бөмбөг авалт хийснээр NBA-д хоёрт, 2.32 блок хийж байснаар дөрөвт жагсч, улирлыг өндөрлүүлсэн. Мөн түүний хамгаалалтын ачаар баг нь өрсөлдөгчдөдөө 93,7 оноог алдаж байснаар шилдэг хамгаалалттай багуудын дөрөвт бичигдсэн байна.

Гэхдээ түүнийг баг плей-оффын эхний шатандаа хүнд ялагдал хүлээгээд байгаа. Тиймээс шагналаа баталгаажуулахын тулд “Атланта”-тай хийх дараагийн тоглолтод анхаарлаа хандуулах зайлшгүй шаардлагатай тулгараад байна.