“Номин талст” хамтлагийн дуучин СТА Т.Дэлгэрмөрөнгийн шүүх хурал өчигдөр Баянзүрх дүүргийн шүүхэд болох байсан ч хойшиллоо. Хоёр долоо хоногийн өмнө шүүх хурал зарлагдсан байсан ч мөн хойшилсон юм. Хурал яагаад хойшлоод байгаа талаар Нийслэлийн шүүхийн хэвлэл мэдээлэл хариуцсан мэргэжилтэн Б.Цэвээнцэрэнгээс тодрууллаа.

– Дуучин СТА Т.Дэлгэрмөрөнгийн шүүх хурал өнөөдөр дахиад хойшиллоо. Яагаад хойшлоод байгаа юм бол?

-Хоёр удаа хойшлоод байна. Анхны  хурал болох үед Т.Дэлгэрмөрөн өмгөөлөгчөө сольж байгаагаа мэдэгдсэн. Шинэ өмгөөлөгч хэрэгтэй танилцах шаардлагатай байсан учир түүний хүсэлтийг хүлээн авсан. Гэтэл өнөөдөр\өчигдөр\ болох байсан хурал дахин хойшиллоо. Учир нь тэрбээр хуучин өмгөөлөгчөө авах болсноо хэлсэн. Тэр  өмгөөлөгч нь Баянхонгор аймагт албан ажлаар явж байгаа учир хурал хийх боломжгүй болсон.Т.Дэлгэрмөрөн ойр ойрхон өмгөөлөгчөө сольж байгаа нь шүүх хурал хойшлоход хүргэж байна.

-Хурлаа хэзээ хийхээр болсон бэ?

– Ирэх долоо хоногийн мягмар гаригт хийхээр боллоо.

-Анхан шатны шүүхээс түүнд хорих ял оноогоод тэнсэн харгалзсан. Зүйлчлэл буруу байна гэж прокурор эсэргүүцэл бичсэн байх аа?

-Эрүүгийн хуулийн 181 дүгээр зүйл ангиар анхан шатны шүүх ял оноосон. Т.Дэлгэрмөрөн хүний биед хүнд гэмтэл учруулсан болохоор Эрүүгийн хуулийн 96 дугар зүйл ангиар шийтгэх ёстой гэж үзэж байгаа юм билээ гэв.

Энэ долоо хоногт дүүргүүдийн шүүх эрүүгийн 97, иргэний 254 хэрэг хэлэлцэн шийдэх аж. Харин Нийслэлийн шүүх эрүүгийн 19, иргэний 41 хэргийг шийднэ. Давж заалдах шатны эрүүгийн  хэргээс зургаа нь хүний амь насыг санаатай хөнөөсөн  болон бусдыг мөлжиж, худалдсан хэрэг байгаа юм байна.

Х.Хангал