Монголын урлагийн ертөнцөд саяхан хэд хоногийн өмнө “Full moon affair” нэртэй өвөрмөц тоглолт болсон юм. Энэ тоглолтын эзэд бол хийлч Ч.Дэлгэрцэцэг буюу Дээгий, дуурийн гоцлол дуучин Ө.Уянга нар байлаа. Бүтэн сарны дор, “VIP” хүрээнд тансаг ширээнд тухалсан зочид оргилуун дарс шимэн хийлийн тансаг аялгуунд гургалдайн хоолойт Уянгын сонгодог уран бүтээлүүд болон дэлхийн шилдэг дуучдын дууг хэрхэн амилуулахыг дэргэдээс нь сонсох ховорхон боломж “iLoft Function House”-д тохиосон юм. Хийлч Дээгийг тайзнаа хараагүй удсан болоод ч тэр үү түүний эрч хүчтэй цоглог аясыг үгүйлсэн үзэгчид бүтэн сарны дор саатсан энэ үдшийн тоглолтод сэтгэл хангалуун байгаа харагдсан шүү. Дээгий сарны гэрэлд хүйт даатал хийлийн аязуудаар жиндүүлэн басхүү сэтгэл дотроос гал дүрэлзтэл догдлуулан бүжгийн талбайд хамт бүжиглэтэл үзэгчдийг өөртөө уусган урвуулж байсан.

Бүтэн сар гарахаар хүн бүр ч янз бүрийн л мэдрэмж төрдөг болов уу. Харин хийлч Дээгийгийн хувьд энэ л өдөр бол зүгээр л нэг тоглохыг хүссэн үдэш бус нэлээдгүй хүлээж, бодож, сонгосон тэргэл сартай үдэш байсан юм. Тэрээр “Тэргэл сар гарахаар би дэндүү их булгиламтгай, эмзэг, галзуудуу болчихдог юм. Энэ дэлхий дээр хайр гэж байгаагүйсэн бол өөр юу ч байхгүй байсан болов уу. Өнөөдөр миний тоглон та нарын сонорыг мялааж байгаа бүхэн ямарваа нэгэн хайр дээр тулгуурласан байгаа.  Хайр агуу учраас түүнийг мэдэрсэн хүн бүрт энэ гайхамшигтай дуугаа зориулъя” хэмээн “Анхны хайр” дууг хийлийн гайхамшигт аялгуугаар мэдрүүлсэн. Мөн тэдний хамт ятгын хатан хаан, “Бөртэ” хамтлагийн ятгачин Ч.Мөнх-Эрдэнэ тайзнаа тоглолоо.   

Дээгийгийн тансаг хийлийн аялгуу энэ үдэш попын хатан хаан Хьюстоны “I will always love you” дууг эгшиглүүлэн дуурийн гургалдайн хоолойт Уянга дуулсан нь үзэгчдэд гэнэтийн бэлэг болсон шүү. Дан сонгодог бүтээл эгшиглэх байх хэмээн таамаглаж байсан үзэгчдэд тэд хамтдаа Toni Braxton-ы “Un break my heart” дуугаар уяраасан бол араас нь алдарт “Хөөрхөн хүүхэн” киноны “Pretty woman” дууг хүргэн зочдыг цоглог хөгжмөөр доргион хамтдаа бүжиглэн нэгэн үдшийг үдлээ.