“Хатагтай Дэйзийн жолооч”, “Сая долларын бүсгүй” зэрэг уран бүтээлүүдээрээ үзэгчдэд танигдсан нэрт жүжигчин Морган Фримен сүүлийн үед найруулагч Луйз Леттериэрийн  “Now You See me” нэртэй нэгэн шинэ кинонд тоглож байгаа гэнэ. Иймд тэрээр янз бүрийн телевизийн шоу, нэвтрүүлгүүдэд уригдан удахгүй нээлтээ хийх уг уран бүтээлийнхээ талаар сурталчлаад нилээд завгүй байгаа бололтой. Морган өнгөрөгч лхагва гаригт л гэхэд KCPQ телевизийн нэгэн нэвтрүүлэгт уригдсан байна.

Энэ үеэр Холливудын нэрт жүжигчний хөгжилтэй гэмээр нэгэн агшин студийн камерт бичигджээ. Учир нь KCPQ-д “Now You See me” кинонд хамтран тоглосон жүжигчин Майкл Кейнтэй хамтдаа ирсэн Морган нэвтрүүлгийн үеэр зүүрмэглээд авчээ. Тэрээр Кейнийг киноныхоо талаар хөтлөгчтэй ярилцаж байх хооронд ийнхүү дуг хийснийг үзэгчид болоод студид байсан хүмүүс нэг их анзаараагүй ч телевизийн камерт хэд хэдэн удаа зүүрмэглэсэн нь бичигдсэн байна.

Түүний тоглосон “Now You See me” кино энэ сарын 31-нд Америкт албан ёсоор нээлтээ хийх аж.