Асашёорюү Д.Дагвадорж АН-д элсч, улс төрийн сонголтоо хийв. Ах Д.Сумъяабазар нь ч мөн өмнөхөн МАН-ын нэрийн өмнөөс УИХ-д суух эрхээ авсан бөгөөд түүний хувьд МАН гэх сонголтоо нэлээд өмнө хийсэн. Хэдийгээр ямар нам улс төрийн хүчнийг сонгох нь хувь хүн бүрийнх нь эрх боловч олон нийтийн зүгээс эдгээр сонголтыг нь өөр зорилготой болов уу гэж хардах нь ч гарч буй бололтой. Үзэл бодол эрс тэс намуудад хуваагдан ажилладаг гэр бүл өөр хэд хэд бий. Нөхөр нь МАН, эхнэр нь АН. Ах нь МАН, дүү нь АН гээд ерөнхийгөөр нь хэлэхгүй бол нэр төр гутаалаа гээд заргалдаад байдаг гэмтэй.

Шууд баталж, нотолчихсон зүйл байхгүй ч бөхчүүд, урлагийнхан улс төрд орцгоохыг хувийн карьераа өсгөх зорилготой гэдэг бол, гэр бүлийнхэн, бизнесийнхэн улс төр рүү зүтгэхийн цаана хувийнхаа бизнесийг хамгаалах гэж ярих нь ч бий. Зөвхөн Монголд ч гэлтгүй өөр орнуудад ч гэр бүлийн бизнесээ хамгаалахын тулд улс төрийн хүчнүүдийн алинд ч тал алдахгүй байх нь бизнесмэнүүдийн хувьд энгийн мэдэх ёстой зүйл нь. Б.Жаргалсайхан ч улс төрийн нам байгуулж, улс төрч болохоосоо өмнө АН, МАН хоёрын аль алинд нь нэг зэрэг хандив өгөөд гүйж явсан жишээ ч бий. 

Улс төр гэдэг улс төрийн намуудын хувьд өгөө аваа, ээлж дараатай байдаг. Нэг нь өнөөдөр ялж байхад, нөгөө нэг нь ялагдаж л байдаг. Ялагдсан үедээ баалуулахгүйн тулд бүгдэнд нь ах дүүсээ шургуулчихвал амар юм биш үү, энэ намуудад чинь.

Ах дүү нар нь намуудыг нэг нэгээр нь “амлаад” авчихлаа. Яршиг, нэг мөсөн Д.Сэржбүдээ нь МАХН-д элсчихвэл ямар вэ.