Булган аймаг энэ жил  31 мянган га талбайд үр тариалахаар бэлтгэж байна. Энэ бол ноднингийн уриншилсан талбайгаар тооцсон хэмжээ аж. Зарим аж ахуйн нэгж, иргэд бусад талбайд тариалбал дээрх хэмжээнээс нэмэгдэнэ гэдгийг аймгийн ерөнхий агрономич Б.Энхбаяр онцолж байна. Тэрээр “Энэ жилийн тариалалтад сум, аж ахуйн нэгж, ард иргэдээс ирүүлсэн мэдээгээр гинжит 57, дугуйт 176 трактор, мөн үрлэгч 152, хөрс боловсруулах 282 дүүжин чиргүүл машин ажиллуулна. Тэдгээр техникийг бүрэн хүчин чадлаар нь эвдрэл сааталгүй ажиллуулахад аймгийн хэмжээгээр үр суулгалтыг ажлын 15-20 орчим хоногт л багтаах бололцоотой” гэв. 

Аймгийн хэмжээнд 5611 тонн үр шаардлагатай. Түүнээс 3881 тонныг нь аж ахуйн нэгж, иргэд өөрсдөө нөөцлөн хадгалж өвөлжөөд одоо нарлуулах, цэвэрлэх, ариутгах зэргээр бэлтгэж эхэлжээ. Харин нийт дүнгээр 1730 тонн үр дутагдалтай байгаа бөгөөд үрийн захиалгыг сумдаас авч, тариалан эрхлэгчдийг дэмжих сангаас авахаар болсон аж. Аж ахуйн нэгжүүд авсан үрийнхээ 30 хувийн үнийг урьдчилгаа болгон өгч, үлдсэнийг намар тушаах ургацаасаа суутган тооцуулахаар шийдвэрлэжээ. Аймгийн стандарт, хэмжил зүйн хэлтэс 18 аж ахуйн нэгжийн 6 сортын 1810 тонн үрийн дээжид шинжилгээ хийснээс 60 гаруй хувь нь стандарт шаардлагыг хангасан байна. Аймгийн хэмжээнд зонхилон “Сэлэнгэ” сортын үрийг нутагшуулан тариалах чиглэл баримтлан ажиллаж байгаа гэнэ.   

Энэ жил  Булган аймгийн хэмжээнд аж ахуйн 91 нэгж, 70 орчим иргэн үр тариа тариална. Нэлээд сумын нутагт өвөл, хавартаа цас ахиу орсон, хуурай халуун салхи бага байгаа тул хөрс чамлахааргүй чийгтэй байгаа гэж үзэж байгаа гэнэ. Одоогоор Сэлэнгэ, Хутаг-Өндөр, Бугат, Хангал зэрэг сумын зарим аж ахуйн нэгж  чийг хаах борнойдолт хийгээд байна.