Булган аймгийн төвийн иргэд энэ хавар махны үнийн хөөрөгдөлгүйгээр хэрэглээгээ хангаж байна. Учир нь, аймгийн Засаг даргын захирамжийн дагуу хаврын улиралд зохиомлоор хомсдол бий болгон үнийн хөөргөдөл гаргахаас сэргийлж зарим арга хэмжээ авсны үр дүн юм. Өнгөрсөн оны сүүлчээр аймгийн Засаг даргын 438 дугаар захирамжаар томилсон ажлын хэсэг төв суурин газрын иргэдийн хэрэгцээнд зориулан мах бэлтгэн нөөцлөх аж ахуйн нэгжээр “Ажнай цэгц” компанийг сонгож гэрээ байгуулан хяналт тавьж ажилласан байна. Ингэснээр аймгийн төвийн айл өрх, иргэдийн хэрэгцээнд зориулсан 70 тонн мах нөөцлөн хадгалжээ. Мөн оны сүүлчээр болсон аймгийн ИТХ-ын VIII  хуралдаанаас гаргасан тогтоолоор махны хомсдол гаргалгүй  үнийг тогтвортой барих зорилгоор төсөвт 50 сая төгрөг тусгаж өгчээ.