Төв банк барилгын компаниудад зориулж 300 тэрбум төгрөгийн хөнгөлөлттэй зээлийн эх үүсвэрийг өчигдөр бүх арилжааны банкуудад байршуулсан талаар албаныхан мэдээллээ. Ингэхдээ жилийн долоон хувийн хүүтэй, 18 сарын хугацаатайгаар байршуулсан байна. Харин хөдөө, орон нутаг, алслагдсан дүүрэгт барилга барих компаниудыг энэ удаад илүү хөнгөлөх буюу жилийн 5.5 хувийн хүүгээр зээл олгох бололцоог хангажээ.

Арилжааны банк нь Төв банкнаас байршуулсан уг эх үүсвэрийг гурван сарын дотор зөвхөн шинээр барих болон баригдаж дуусаагүй орон сууцны барилгад зориулсан эх үүсвэрээр зээл гаргах үүрэгтэй аж. Хэрэв тухайн банк энэ үүргээ хэрэгжүүлээгүй тохиолдолд ашиглаагүй санхүүгийн эх үүсвэрийн үлдэгдэлд Төв банкнаас 13.5 хувийн хүү тооцож, ашиглаагүй эх үүсвэрийг хүүгийн төлбөрийн хамт эргүүлэн татах юм байна.  

Энэ нь барилгын салбарын нийлүүлэлтийг дэмжих зорилготой бөгөөд арилжааны банкуудтай гэрээ хийсний үндсэн дээр барилга барих компаниудад  зориулсан хөнгөлөлттэй зээл ажээ. Ийнхүү барилга, бүтээн байгуулалтын чиглэлээр үйл ажиллагаа явуулдаг компани хамгийн эхлээд арилжааны банкинд хандан бүрдүүлэх баримтаа лавлан, зээл авах боломжтой эсэхээ тодорхойлуулж, жилийн долоон хувийн хүүтэй зээл авах юм байна.