Хүүхдийн урлан бүтээх тө­вийн үүдэнд пролетарийн их багш Ленин буюу Владимир Ильич Ульяновын хүүхэд насны босоо баримал байдгийг санаж байна уу. “Энэ гадаад хүүхэд хэн бэ” гэсэн хүүгийнхээ асуултад хариулахын тулд 1917 оны Оросын Октябрийн хувьсгал, тэр хувьсгалын нөлөөгөөр Монголд гарсан 1921 оны ардын хувьсгал, социалист, капи­талист нийгэм гээд ХХ зууны түүхийг товчхон тайлбарлах хэрэг гарсан ч энэ бүхний эцэст Володя тэртэй тэр орос хүүхдийн хөшөө яагаад тэнд байгааг ойлгуулж чадсангүй. Мэдээж үүний оронд супермэн ч юм уу, хүн аалзны хөшөөний тухай тайлбарласан бол илүү ойлгох нь тодор­хой. “Буддын шашинтай хүн Бурхан багшийнхаа, христийн ша­шин­тан Есүсийнхээ, лалын шашин­тан зөнч Мохаммедийнхаа сур­гаа­лийг дагадаг шиг нийгмийн социа­лист тогтолцоотой улс орнууд том болоод Ленин нэртэй болсон энэ хүний үгийг сургааль мэт дагадаг байсан юм. Ээж нь ч түүний олон сургаалийг нь сургуульд байхдаа цээ­жил­дэг байлаа. Жишээ нь, сур сур бас дахин сур гэдэг” гэж хэлж хүүхдийнхээ ээлжит “яагаад” гэдэг асуултаас бултаж билээ. Түүхийн он цагийн хуудас эргэхийн хэрээр бяцхан Володягийн талаар шинэ шинэ баримтуудыг гарган тавьсаар байна. Эргэн тойрныхныгоо бүгдийг бурхны оронд илгээсэн, сэтгэл мэд­рэлийн өвчтэй, тэмбүүтэй гэх мэт. “Сур сур бас дахин сур” гэсэн үгээ хэлсэн ч юм уу, үгүй ч юм уу. Хүн болон төлөвших хамгийн чухал үе болох бага дунд боловсрол олох цагаараа бид шинжлэх ухааны оно­лын зах зухаас гадна үзэл суртлын хүмүүжил давхар авсан бөгөөд энэхүү үзэл суртлын хичээлийн зо­хиогч нь нөгөөх Володя нэртэй хүү байсан юм. Нэг үгээр хэлбэл, 1990 он хүртэл монголын хүүхэд багачууд стан­дарт боловсрол олж аваагүй гэсэн үг.

Гэхдээ 1990 оноос хойш монгол бага­чууд стандарт боловсролыг эзэм­шээд явж байгаа юм биш. Харин ч Володягийн бүтээсэн нийгмийн тог­толцоо, арга барилаас салаагүй байгаа салбарын нэг нь боловсролын салбар болоод байгааг бид бүгд харж байгаа. Монгол бичиг, Мэдээлэл зүй гэсэн хичээлийн төрөл нэмэгдэж, Володягийн төрөлх орос хэлийг заадаг байсан багш гурван сарын англи хэлний курст сурч англи хэлний багш болцгоосноос өөр шинэчлэлийг олж харахгүй байна. Нэн ялангуяа хүүхдийг нийгмийн харилцаанд сур­гах, сэтгэлгээний цар хүрээг тэлэх, хувь хүн болгон хүмүүжүүлэх тал дээр анхаарсан зүйл үгүй, “багш бол хаан” гэсэн захиргаадалтын хэлбэр хэвээр байгааг олон хүн шүүмжилдэг. Боловсролын салбарын стандарт ямар байгааг шинээр хөдөлмөрийн зах зээлд орж ирж байгаа шинэхэн төгсөгчид бүрнээ илтгээд өгдөг.

Нийгмийн хөгжил дэвшил, нийг­мийн баялаг гэж хичнээн ярилаа ч энэ хөгжил дэвшил болоод баялгийг бүтээгчид нь Володя хүүгийн амьдарч байсан өнгөрсөн үеийнх шиг мэдлэгтэй, сэтгэлгээтэй байвал Монгол Улс дэлхийн хөгжлөөс гээг­дэж, дэлхийн траншейд амьдрах болно. Тийм гунигт ирээдүйг да­раа дараа­гийн үедээ үлдээхгүйн тулд боловсролын шинэ стандарт нэвтрүүлэх гэж байна. Монгол Улсын Засгийн газар, Кембрижийн Их сургуулийн олон улсын Шалгалтын төв хооронд Бага, дунд боловсролын стандарт, хөтөлбөрийн шинэчлэлийн талаар хамтран ажиллах харилцан ойл­голцлын санамж бичигт өнгөрсөн долоо хоногт гарын үсэг зурлаа. Энэ­хүү арга хэмжээнд Кембрижийн хөтөлбөрийг Монголд хэрэгжүүлэх ажлыг анхлан санаачилсан, тус хө­төл­бөрийн автор гэж хэлж болох Монгол Улсын Ерөнхий сайд С.Бат­болд болон Кембрижийн Үнэл­гээ­ний группийн дарга Симон Либус нар байлцжээ.

Монгол Улсын Ерөнхий сайд С.Батболд энэхүү түүхэн үйл явдлын гэрч болж тэнд цугласан олонд ханд­аж үг хэлэхдээ “Өнгөрсөн XX зуунд манай улс боловсролын сал­бар­таа  Зөвлөлтийн боловсролын сис­те­мийг нэвтрүүлж, улсаа улс шиг улс болгосон. Харин өнөөдөр XXI зуунд Монгол Улс, монгол хүнээ олон улсын стандартад нийцсэн боловсролын тогтолцоонд оруулах том ажлын эхлэлийг тавьж байна” гэж онцоллоо.

БСШУЯ-ны төлөвлөж байгаагаар ирэх хичээлийн жилээс 30 сур­гуу­лийн тодорхой ангиуд монгол, англи хос хэлээр хичээллэж эхлэх юм бай­на. Өнгөрсөн жилээс туршилт эхэлсэн Хан-Уул дүүргийн 113 дугаар сургууль Кембрижийн стандартын гэрчилгээ авсан нь их ажлын эхлэл болж байна. Энэ их ажил буюу боловсролын шинэ стандарт Монгол Улсыг XXI зуунд авч явах юм. Дээр дооргүй хөөрцөглөөд байгаа уул уур­хай биш шинэ монголчуудын тархин дахь их цэнэг Монголыг хөгжлийг шинэ шатанд гаргана гэдэгт итгэл­тэй байна. Харин цэнэглэгч нь Кембрижийн стандарт байх болно.