Төрийн албаны зөвлөлийн ээлжит хуралдаанаар Хүүхдийн төлөө үндэсний газрын даргын сонгон шалгаруулалтыг явуулсан байна. Тус албан тушаалд арван хүн материалаа ирүүлснээс сонгон шалгаруулах комиссын саналыг хэлэлцээд Д.Алтайг Хүүхдийн төлөө үндэсний газрын даргын албан тушаалд томилуулахаар дүгнэлт гаргажээ. Мөн энэ удаагийн хуралдаанаар Зам, тээвэр, барилга, хот байгуулалтын яамны Санхүү хөрөнгө оруулалтын газрын даргын ажлын байрны орон тоон дээр сонгон шалгаруулалтыг хэлэлцээд Ё.Манлайбаатарыг томилуулахаар Монгол Улсын Ерөнхий сайд,  Зам, тээвэр, барилга, хот байгуулалтын яамны Төрийн нарийн бичгийн даргад саналаа  хүргүүлэхээр тогтжээ.

Санхүүгийн зохицуулах хороо, Үндэсний статистикийн хороонд  Төрийн албаны зөвлөлөөс шалган зааварлах ажил зохион байгуулсныг дээрх хурлаар хэлэлцжээ. Удирдах ажилтны сонгон шалгаруулалтгүй томилогдсон Санхүүгийн зохицуулах хорооны Санхүүгийн тасгийн, Хамтын ажиллагааны хэлтсийн,  Үнэт цаасны газрын орлогч дарга нарыг, томилсон шийдвэрийг хүчингүй болгож, эдгээр албан тушаалын сул орон тоог нөхөх сонгон шалгаруулалтыг тавдугаар сард багтаан явуулах болсон байна. Төрийн албаны жинхэнэ албаны нөөцийг бүрдүүлэх журам зөрчин томилогдсон найман иргэнийг  ажлаас нь чөлөөлөн, нөөцөөс нөхөх ажлыг зохион байгуулахыг дээрх байгууллагад даалгажээ.