Японы монголч эрдэмтэн Конагая Юүкид эзэн хааныхаа шагналыг хүртэхээр болсоныг нь тохиолдуулан, БШУ-ны сайдын талархлын бичиг, Монгол Улсын “Шинжлэх ухааны тэргүүний ажилтан” цол, тэмдэг гардуулах ёслол 5 дугаар сарын 07-нд Осака хотод боллоо. Осака хотод суугаа Монгол Улсын консул Ч.Куланда шагнал, талархлыг гардуулсан байна. Монгол Улсын Төрийн далбаа намируулсан, Консулын албан байранд болсон талархал илэхийлэх ёслолд Японы хэвлэл мэдээллийнхэн хүрэлцэн ирж сурвалжилсан юм. Японы эзэн хааны 2013 оны шагналын зэнээр тодорсон 37 хүний нэг, хатагтай Конагая Юүки нь манай оронд суралцсан анхны япон эмэгтэй, монгол судлалд амьдралынхаа дөч шахам жилийг зориулсан эрдэмтэн хүн юм.

Японы бахархал хэмээх эзэн хааны шагналыг 1881 оноос олгож эхэлсэн бөгөөд Японы улсын соёл урлаг, нийгэм хүмүүнлэг, спорт, шинжлэх ухааны салбарт үр бүтээлтэй ажилласан, япон хүний сэтгэлгээ, оюуны бахархал болсон иргэн хүртэх өндөр үнэлэмжтэй. Шагналыг 5 сарын 15-ны билэгт сайн өдөр Эзэн хаан өргөөндөө  биечлэн гардуулах юм байна. Нэр хүндтэй энэхүү шагналыг монгол судлаачид олгож буй нь Монголын нэр хүндийг өсгөн ахиулах, Япон болон дэлхий дахинд монгол судлалыт талаарх  сонирхол, цар хүрээг нэмэгдүүлэх ихээхэн ач холбогдолтой юм.

Японы эзэн хааны шагналын эзэн Конагая Юки нь анх 1979 онд Монгол улсд хөл тавьж, монгол хэлд шамдан суралцсанаар Монголыг судлах эрдмийн гараа нь эхэлжээ. Монгол ахуй, нүүдэлчдийн соёл иргэншил, монгол угсаатны онцлог, монгол уламжлалыг тасралтгүй судалж олон арван бүтээл туурвисан байна. Тэрээр “Миний эх орон Япон бол жижигхэн газарт түм буман хүн орших давчуу юм. Уудам тал нутагтай, цөөн хүн амьдардаг Монгол оронд агуу их болгон орших бус уу.  Тэгээд би Монголд “дурласан” хэрэг” гэж Монголыг судлах болсон шалтгааныг нь сонирхсон сэтгүүлчийн асуултанд хариулжээ.

Конагая Юки Осака хотноо амьдарч, Осакагийн Угсаатны судлалын музейд Монголыг дагнан судалсаар байна. Хатагтай Конагая Юки монгол хүүхдүүдэд тусламжийн гараа сунгаж, эхийн сэтгэлээр хандаж байсан нь сайд Л.Гантөмөрийн талархах бас нэгэн учир байжээ.

Шинчлэлийн Засгийн газар Монгол судлалыг хөгжүүлэхэд онцгой ач холбогдол өгч, Монгол судлалын бодлого чиглэлийг тодорхойлоод байгаа энэ цаг үед Боловсрол Шинжлэх ухааны сайд монголч эрдэмтнийг шагнан талархал илэрхийлсэн нь монгол судлалд урам зориг хайрлах алхам боллоо.