Үнэтэй машин уначихсан нь тийм азтай байдаг юм уу, бүү мэд. Автомашины улсын дугаарыг санамсаргүй байдлаар буюу автомат тохиролын дагуу сонгож өгнө гэх журамтай болсон ч хамаг аятайхан дугаарууд үнэтэй машинтай, мөнгөтэй нөхдөд очсон хэвээр. Автомашины улсын дугаар ямар байх нь хүрээнийхэн дотроосоо ялгарах нэг боломж болсныг ч мэдэхгүй хүн гэж үгүй. Дөрвөн тоо нь адилхан, азын дугаар, 9911 гэх мэт улсын дугаартай бол боссууд дундаа арай дөмөгхөн нь гэж тооцогдоно. Иймэрхүү улсын дугаартай машиныг замын цагдаа нар зогсоохоос ч жийрхэнэ. Улаан цайм дүрэм зөрччихгүй л бол зогсоохгүй. Учир нь зөвхөн энэ мэт улсын дугаарандаа унасан машин шигээ мөнгө төлж чадаж байгаа хүн Замын цагдаагийн газрын удирдах албан тушаалтныг танихгүй байна гэж үгүй. Үгүй юм аа гэхэд ганц цагдааг ажилтай байлгах эсэхийг, албан тушаалтайгаа, “ашиггүй байрлалд зогсоох” эсэхийг шийдчихтэйгээ.

Үнэхээр азын дугаартай, адилхан тоотой, төрсөн өдөр, утасны дугаарынхаа тоог машин дээрээ байлгах боломж байдаг бол хэн ч татгалзахгүй. Гэвч энэ боломжийг нь хэн нэгэн цагдаагийн газрын дарга, нөлөөтэй хэдхэн нөхөд л олгох эсэхийг шийднэ. Угтаа бол улс нь үүнийг нь илээр үнэлээд, мөнгөтэй чадалтай нь ав гээд өрсөлдүүлчихвэл. Гол нь азын дугаар авах гэсэн хүслийнхээ төлөө өгч буй сая сая төгрөгнүүд танихгүй даргын халаасанд биш улсын төсөвт ордог болчихвол болох нь тэр. Төрийн өмнөөс жаахан шуналтчихвал, энэ сайхан дугаарнуудыг авсан эрх нь “арван жил хүчинтэй” гээд хэдэн жилийн дараа дахиад наймаалсан ч яадаг юм.

Тэртэй тэргүй дугаарын наймаа, дугаараар өрсөлдөх өрсөлдөөн явж байгаа хойно бүхнийг нь нээлттэй л болгочихьё. Машин автоматаар сонгож өгснийг нь авья гэвэл үнэгүй л ав. Харин өөрөө сонголт хийгээд тэр нь байвал нэмж мөнгө төлөөд л ав. Азын дугааруудыг харин хэн нь бядтай нь шударгаар үнэ хаялцаад аваг. Үр дүнд нь хэдэн төгрөг улсын төсөвт маань орог.