Хятадын Засгийн газар үл хөдлөх хөрөнгө болон хүнсний бүтээгдэхүүний үнийг хяналтандаа авах арга хэмжээ авч эхэлжээ. Хэдийгээр үнийн өсөлтийг бууруулахаар хичээж байгаа боловч Хятадад 2008 оноос хойш инфляци хурдтай өсч байгаа юм. Өнгөрсөн гуравдугаар сард бараа бүтээгдэхүүний үнэ 5.4 хувиар өссөнийг  Хятадын үндэсний статистикийн төвийн судалгаа харуулжээ.

Хятадын эдийн засэг өнгөрсөн нэгээс гуравдугаар сарын хооронд 9.7 хувиар өссөн юм.

Статистикийн үзүүлэлт зах зээлийн таамгаас өндөр гарсан нь инфляцийн дарамт их байгааг харууллаа  гэж эдийн засагчид үзэж байна.  Хятадын Төв банк хүүгийн хэмжээг дөрвөн удаа нэмсэн боловч инфляцийн өсөлтийг бууруулж хүчрэхгүй байгаа ажээ.  Хятадын Ерөнхий сайд Вэн Зябао инфляцийн өсөлтийг бууруулахын тулд шаардлагатай арга хэмжээг авахаа энэ долоо хоногт мэдэгдсэн юм.