Монгол Улсын Ерөнхий сайд С.Батболдыг БНХАУ-ын Засаг захиргааны тусгай бүс Хонгконгийн удирдлагууд өндөр дээд хэмжээнд хүлээн авч уулзлаа. Ерөнхий сайд С.Батболд Хонгконгийн засаг захиргааны тусгай бүсэд зочилж, гадаадын хөрөнгө оруулалтыг татсан банк, санхүү, боловсрол, хөрөнгийн зах зээлийнх нь туршлага монголын талын сонирхолыг татаж буйг тэмдэглэн эдгээр салбаруудтай хамтын ажиллагаагаа хөгжүүлэх сонирхолтой байгаагаа илэрхийлэв.     
Хонгконгийн амбан захирагч Доналд Цан Ерөнхий сайд С.Батболдын тавьсан хүсэлтийг дагуу шинжлэх ухаан, эрдэм шинжилгээ, боловсролын салбарт хамтран ажиллаж Монголын залуусыг олноор сургах боломжтой гэлээ. Хонгконгийн биржүүдээр дамжуулж Монголын компаниудыг хөрөнгө оруулалтаа нэмэгдүүлэхэд туслах, хөрөнгийн зах зээлийг хөгжүүлэх зорилт тавьж буй бизнесменүүдийг ирж туршлага судлахыг урилаа.    
Уулзалтын үеэр талууд худалдаа эдийн засаг, боловсролын салбарын хамтын ажиллагааг хөгжүүлэх эрх зүйн үндэс бүрдсэнтэй санал нэгдэв.  
Энэхүү ажлын айлчлалын үр дүнд Хонгконгийн шууд хөрөнгө оруулалтыг Монголд татан оруулах, аялал жуулчлал, хөрөнгийн зах зээлийг өргөжүүлэх үүднээс Улаанбаатар Хонгконгийн хооронд шууд нислэг хийх асуудлыг яаралтай шийдвэрлэхээр боллоо. Мөн Хонгконгод Монгол Улсын Консулын төлөөлөгчийн газрыг байгуулахыг талууд дэмжив. Уулзалтын төгсгөлд Ерөнхий сайд С.Батболд Засгийн газрын бодлого үйл ажиллагаа, хөрөнгийн зах зээлийн шинэчлэлийн явц, ажлын айлчлалын үр дүн, хөрөнгө оруулагчдын сонирхсон асуудлаар Dowjones болон Thomson Reuters агентлаг, The Wall Street Journal сонинд ярилцлага өглөө гэж Засгийн газрын Хэвлэл мэдээллийн албанаас мэдээлэв.