Их Британийн мэдээллийн алдарт “BBC” телевизийн сурвалжлагч Лондонгийн их сургуулийн оюутнуудтай нэгдэн дэлхий нийтийн анхаарлыг татаж буй Хойд Солонгос улсад нэвтрэн нууцаар нэвтрүүлэг бэлтгэжээ. Гэвч түүнийг Лондонгийн их сургуулийн оюутнууд болон албаныхны зүгээс оюутнуудын амь насыг эрсдэлд учруулж, сургуулийн нэр төрийг гутаасан хэмээн буруутгасан байна. “BBC” телевизийн "Panorama” нэртэй нэвтрүүлгийн сурвалжлагч Жон Свини гэгч дуулиант нэвтрүүлэг бэлтгэхийн тулд өнгөрсөн сард эхнэр болон зураглаачийнхаа хамт Лондонгийн их сургуулийн эдийн засаг, улс төрийн ангийн оюутнуудтай нэгдэн Хойд Солонгос улсад нууцаар ажиллаад ирсэн аж. Жон Свини нь Хойд Солонгост нэвтрэх анкетан дээрээ Лондонгийн их сургуулийн докторын ангийн оюутан гэж хуурамчаар мэдүүлж, тус улсад нэвтэрсэн байна.

Харин Лондонгийн их сургуулийн оюутнуудын зүгээс Жон Свиниг гадаадын хэвлэл мэдээллийнхний хувьд хаалттай ертөнц болох Хойд Солонгост нууцаар нэвтрүүлэг бэлтгэх гэж буйгаа тэдэнд бүрэн тайлбарлаагүй хэмээн мэтгэж, тэдний амь насыг эрсдэлд учруулсан хэмээн буруутгаж байгаа юм байна. Мөн тус их сургуулийн албаныхны зүгээс ВВС-ийн сурвалжлагч Жон Свинигийн үйлдэл нь тус сургууль болоод Хойд Солонгос улсын хоорондох ирээдүйн итгэлцлийг хөндөж, хувийн ашиг сонирхлын үүднээс оюутнуудын амь насаар дэнчинд тавьсан хэмээн буруутгажээ. Түүнчлэн Лондонгийн их сургуулийн захиралын Крейг Калхуны “Twitter”-тээ дээрх аялалыг албан ёсны бус байсан хэмээгээд, ВВС телевиз үүнийг зохион байгуулсан гэж мэдэгдсэн байна. Харин ВВС болон сурвалжлагч Жон Свини оюутнууд түүний үйлдлийн улмаас эрсдэлд учирч буйгаа хангалттай ухамсарлаж байсан хэмээн мэдэгдэж байгаа аж. Жон Свини оюутнуудад өөрийнхөө жинхэнэ нэрийг бас сурвалжлагч гэдгээ удаа дараа хэлсээр байсан гэжээ. 

Гэвч Лондонгийн их сургуулийн зүгээс дээрх шалтгаанаар ВВС телевизээр өчигдөр буюу даваа гаригт цацахаар товлосон "Panorama” нэвтүүлгийн уг дугаарыг цуцалж, албан ёсоор уучлал гуйхыг шаардсан байна. Харин ВВС-ийн тус сургуулийн шаардлагыг эрс эсэргүүцжээ.

БНАСАУ нь өөрийн нутаг дэвсгэрт гадаадын аль ч мэдээллийн агентлагийн сэтгүүлчдийг нэвтрүүлдэггүй бөгөөд өнгөрсөн 2009 онд Америкийн хоёр сэтгүүлч Хойд Солонгос  болон БНХАУ-ын хоорондох хил дээрээс мэдээлэл бэлтгэснийхээ төлөө баривчлагдан, хорих ялаар шийтгүүлж байсан аж. Харин тэднийг АНУ-ын экс Ерөнхийлөгч Билл Клинтон өөрийн биеэр Хойд Солонгост очиж, албаныхантай тохиролцсоны үндсэн дээр жилийн дараа суллаж байсан  байна.