Ойрын өдрүүдэд нийт нутгаар дулаарч, өвөл орсон цас хайлж, нойтон цас орж буйтай холбогдуулан иргэд олон нийтийг болзошгүй шар усны үерээс урьдчилан сэргийлэхийг нийслэлийн Онцгой байдлын газраас сэрэмжлүүлж байна. 

Нийслэлийн Онцгой байдлын газраас дүүргүүдийн Өмч газрын харилцааны албад, Цагдаагийн хэлтсүүдтэй хамтран үерийн аюултай бүсэд суурьшсан айл өрхийг шар усны үерт автахаас урьдчилан сэргийлэх ажлыг зохион байгуулж, нүүлгэн шилжүүлэх хүртэлх арга хэмжээг авч ажиллах аж. Мөн нийслэлийн дүүргүүдийн нутаг дэвсгэрт байрлах үерийн хамгаалалтын барилга байгууламж, ус цуглардаг гуу жалга, гол горхи, булаг шандны эрэг дагуух хогийг ч мөн цэвэрлэх юм байна.