Холливудын хээнцэр ганган имижээс ажил хэрэгч дүр төрх рүү хувирсан жүжигчин Анжелина Жоли сүүлийн үед тунчиг завгүй байгаа гэнэ.

Өдгөө 37 настай жүжигчин бүсгүй ойрын хэдэн өдрийн турш “Их найм”-ын уулзалтад бэлтгэж буй Британийн Засгийн газрын эрхмүүдтэй уулзах болсон нь гэрэл зурагчдын дуранд өртөх болжээ.

Хэвлэлүүдийн мэдээлж байгаагаар түүнийг магадгүй НҮБ-ын үүрэгт ажилтай нь холбоотойгоор, мөн үргэлж санаа тавьдаг дүрвэгсдийн асуудлаар дээрх уулзалтад оролцох бололтой гэсэн яриа хэдийнэ тархсан гэнэ.

Жоли өчигдөр буюу пүрэв гаригт “Lancaster House”-ийн гадаа Их Британийн Гадаад хэргийн сайд Уильям Хейгтэй ярилцан зогсч байгаа нь ийнхүү гэрэл зургийн хальснаа буужээ. 

Хойд Солонгос болон Сирийн асуудалд онцгойлон анхаарч байгаа “Их найм”-ын уулзалт Умард Ирландад зургадугаар сарын 16-18 нд зохиогдох аж.