Элсэлтийн ерөнхий шалгалтын бүртгэл дуусахад найм хоног үлдлээ. Бо­ловсролын үнэлгээний төвийн мэр­­гэжилтнүүдийн хэлж буйгаар төг­сөгчдийн олонхи нь бүртгэлдээ хамрагджээ. Элсэгчдийг бүртгэх ажил өчигдрийн байдлаар нийслэлд 85, орон нутагт 90 ор­чим хувьтай байна. Одоогоор ямар нэгэн хүндрэл гараагүй аж. 

Гэсэн хэдий ч Боловсролын үнэлгээний төв дээр энэ асуудлаар зөвлөгөө авах, бичиг баримтын зөрчлөө арилгуулахыг хүссэн эцэг эхчүүдийн хөл татарсангүй. Тэдний хувьд зөвлөгөө авахаас гадна энэ онд гаргасан элсэлтийн ерөнхий шал­галтын дасгалын эмхэтгэлийг нэлээд сураглаж байв. Харин холбогдох албаны хүмүүс тэдэнд “Тестийн эмхэтгэл дуус­сан. Дахин хэвлэхгүй” гэсэн ха­риуг өгч байна. Учрыг лавлавал “Нэг хичээлийн тестийн эмхэтгэлийг шалгалт өгөх нийт хүүхдийн 10 ор­чим хувьд хүртээмжтэй байхаар хэв­лэсэн. Түүнээс биш хүүхэд бүрийн тоогоор хэвлэх боломж байгаагүй. Нэг хүүхэд ном авлаа гэхэд анги, хамт олноороо хэ­рэг­лэх боломжтой гэж үзсэн” хэ­мээх хариултыг өглөө. Тиймээс сураг­чид элсэлтийн ерөнхий шалгалтын тестийн эмхэтгэлийг Боловсролын үнэлгээний төвөөс бус анги, хамт олон, найз нөхдөөсөө сураглах  хэрэг­тэй болжээ.

Энэ жилийн хувьд элсэлтийн ерөнхий шалгалтын журамд нэлээд өөрчлөлт орсон. Үүний дагуу Бо­ловсролын үнэлгээний төвийн даал­гаврын сангаас санамсаргүй түүвэр­лэх аргаар сонгон хичээл тус бүрээр авах шалгалтын сэдвийг бэлтгэх юм. Ерөнхийдөө элсэлтийн ерөнхий шал­­галтын тестийн эмхэтгэлд орсон даал­­гавартай төстэй зүйл шалгалтад ирнэ хэмээн ойлгож болно. Нийт су­рагч­­дын дунд “Тестийн эмхэтгэлд ор­сон даалгаврыг цээжилчихвэл шал­галтдаа санаа зовох зүйлгүй болно” гэх ойлголт түгээмэл байна. Тэгвэл “Эл­сэлтийн ерөнхий шалгалтын эмхэт­гэлд орсон даалгавруудаас түүвэрлэж авна. Гэхдээ яг тэр хэвээр нь биш. Ялгаатай зүйлс ч олон бий” хэмээх хариултыг мэргэжилтнүүд өгч байна. Математикийн хичээл дээр жишээ авахад бодлогынх нь ха­риуг нэгэнт номон дээр гарсан дааг­лаврыг  тэр чигээр нь бус зарим тоог нь өөрчилж оруулах аж. Тиймээс су­рагчид тестийн эмхэтгэлд орсон бод­логын хариунд бус хэрхэн бодох вэ гэдэг дээр ажиллах ёстой юм байна.

Элсэлтийн ерөнхий шалгалтад бүртгүүлсэн зарим сурагчидтай уул­зав. Тэд элсэлтийн ерөнхий шал­галтуудаа өгөхдөө “цочроогоо гаргаж” эхлэхээр төлөвлөж байгаа гэнэ. Тодруулбал, сурагчид хамгийн эх­ний шалгалтаа сонгосон мэргэжлийнхээ дагуу бус  эхний өдөр хуваарь нь тавигдсан аль нэг хичээлээр өгөх хүсэлтэй байна.  Мэргэжилтнүүдийн хэлж буйгаар хүүхдүүдийн олонхи  нь 4-5 хичээлээр шалгалт өгөхөөр бүртгүүлсэн байна. Гэхдээ сурагчид 10 хүртэлх хичээлээр шалгалт өгч болох юм. Түүнчлэн шалгалтаас өмнө шалгалт өгөх хичээлээ солих, өөр хичээл нэмэх боломжтой.

Элсэлтийн ерөнхий шалгалттай холбоотой маргаан, гомдол, санал жил бүр гардаг. Өнгөрсөн онд л гэхэд элсэлтийн ерөнхий шалгалтын тест алдаатай байсан гэсэн гомдлыг 20 гаруй хүн тавьж байсан билээ. Мөн шалгалтын матиариалыг хэвлэх явцад тест задардаг гэх гомдол ч удаа, дараа гарч байсан юм. Харин Боловсролын үнэлгээний төвөөс “Тест задрах ямар ч боломжгүй” хэмээх хариултыг өгч байна. Түүнчлэн даалгаврыг боловсруулах явцад шинжээчдийн баг дүгнэлт гаргаж, мэргэжлийн зөвлөл шүүн хэлэлцсэн тул алдаа гарахгүй хэмээлээ.

Зохиогчийн эрх:
"Улс төрийн тйом" сонин