УИХ-ын Аюулгүй байдал, гадаад бодлогын байнгын хорооны хуралдааныг өнөөдөр 14.00 цагт хуралдуулахаар болжээ. Өчигдөр тус байнгын хорооны хуралдаан үдээс хойш товлогдсон байсан ч хуралдаж чадаагүй өнөөдөр болгосон юм. Хэлэлцэх асуудлын тухайд тодруулбал, УИХ-ын гишүүн Б.Бат-Эрдэнээс Уул уурхайн сайд Д.Ганхуягт хандан тавьсан Монгол Улсын Засгийн газар Оюутолгой орд газрыг ашиглах хөрөнгө оруулалтын гэрээг байгуулахад санхүүгийн зөвлөхөөр ажилласан “Голдмен сакс” компани “Айвенхоу Майнз Лимитэд”-д хувьцаа эзэмшдэгээ мэдэгдэлгүй зөвлөгөө өгсөн үйлдэл, эс үйлдэл байгаа эсэхийг шалган судалж, дүгнэлт ирүүлэх тухай тавьсан асуултын хариуг сонсох юм. Мөн ОХУ, Герман улсын Элчин сайдын яамдын 2011-2012 оны улсын төсвийн, хөрөнгө оруулалтын гүйцэтгэл, бүтэц, орон тоо, зохион байгуулалт, газар, байрны асуудалтай танилцаж, хяналт шалгалт хийсэн тухай тайлан сонсохоор төлөвлөөд байгаа юм.