Өмнөд Солонгосын рэппэр PSY өчигдөр “Gentleman” нэртэй нэгэн шинэ уран бүтээлээ хүргэхэд бэлэн болоод байгаа талаар мэдэгджээ. Тэрээр энэхүү шинэ дуугаа “Gangnam Style”-ийн нэгэн адил дуу хөгжим сонирхогчдыг байлдан дагуулна гэдэгт итгэлтэй байгаа гэнэ. Бүжгийн хэмнэлтэй уг бүтээлээ PSY энэ сарын 12-ноос эхлэн сонсогчдын хүртээл болгох бөгөөд тэрээр анх удаа хийх гэж буй өөрийн бие даасан тоглолтондоо ийнхүү шинэ уран бүтээлээ хүргэх аж.

PSY өчигдөр өөрийн улсын нэгэн телевизийн нэвтрүүлэгт хэлэхдээ “шинэ дуу маань мөн л бүжгийн хэмнэлтэй хүмүүст эрч хүч өгөх уран бүтээл. Гэхдээ дууныхаа клипэнд гарах бүжгийн талаар тодорхой ярьмааргүй байна. Харин Солонгосчуудын хувьд бүгд энэ бүжгийг мэднэ” гэжээ.

Тэрээр мөн саяхан Рейторст өгсөн ярилцлагандаа “бие даасан тоглолтоо хийж, фэнүүдтэйгээ нэгэн үдшийг өнгөрүүлэх мөч ойртож байна. Гэхдээ түүнээс өмнө бэлтгэл ажилтай холбоотой хийх зүйл их байгаа учраас цаг зав багатай байна” хэмээн ярьжээ.