Ямар ч арга хэмжээ, үйл ажиллагааны ард санхүүгийн асуудал бий. Улс төрийн жагсаал цуглаан, тэр ч бүү хэл өлсгөлөн зарлахад хүртэл ард нь мөнгөний асуудал явж л байдаг. Ямар нэг гэмт хэргийг илрүүлэхэд хэн хэнтэй ямар холбоотой вэ гэдгийг тогтооход эдийн засгийн ул мөрийг нь хардаг онол ч бий. Хэрэв энэ онол үнэн бол хөрөнгөжсөн дарга нарт зориулагдсан мөнгөний урсгалыг судлах нь ач холбогдолтой байж болох юм. Өмнө судлаач П.Дүгэр “Н.Энхбаярын сонины байшин, зочид буудал, ГОК-д шахсан ган бөмбөлөгийн хэрэг л гээд байна. Харин түүний болон түүний гэр бүлийнхний нэр дээр байдаг, асар үнэтэй үл хөдлөх хөрөнгүүдийг ямар эх үүсвэрээр авсан болохыг хэн ч сонирхохгүй байгаа юм” гэж байсан. Үнэхээр ямар эх үүсвэрээс олж авсан бэ гэдэгт хариулвал алсдаа хөрөнгө мөнгө завшсан арга замуудад нь хаалт хийж болох. Ингэж бодвол, өнгөрөгч хугацаанд МАХН-ын дарга Н.Энхбаярын төлөө хэчнээн хэмжээний мөнгө зарлагадаж, үүнд хэн хэдийг гаргасан бол гэдэг тооцоо гарвал их сонин дүр зураг харагдах байх. Ард түмний хуралдай гэж орон нутгаас авчирсан хүмүүсийг нийслэл байлгах, хооллох ундлах, өлсөгчдийг ижилсүүлэн хувцаслах, гадаадын үнэтэй хуульчид хөлсний мөнгө, Америкийн өдөр тутмын сонины үнэтэй нүүрэнд тавих захиалгат материал, намынхаа талаар мууг дуугаргахгүй байх хэвлэлийнхэнтэй хийх гэрээний төлбөр гээд “Н.Энхбаярыг суллах төлөвлөгөө” –нд хэчнээн мөнгийг хэн төлөв. Мэдээж хэн ч өөрийн хөлс хүчээрээ олсон мөнгөө ямар ч үр дүнгүй зүйлд цацаад байхгүй. Хэрэв өгөх өр төлбөр, ашиг сонирхолгүй л бол.

Бизнес улс төртэй хутгалдаж эхэлсэн үеэс л санхүүжүүлэгчид нууц байсаар ирсэн. Тэдэн дунд улаан цагаандаа гарсан нь ч бий. Үеийн үед аль ч намд тал алддаггүй бизнесмэнүүд байсаар ирсний жишээ олон. Хамгийн гол нь улстөрчдийг санхүүжүүлэгчид байж гэмээнэ тэд хөдөлж чаддаг гэдэг нь л тодорхой юм. Эдгээр нууцлаг ноёнтонгуудыг ил болгочихвол Н.Энхбаярын “сүлжээ” үндсэндээ тодроод ирнэ. Н.Энхбаярын хүмүүс гэгддэг “Элсний 13”-ынхнаас эхлээд, түүний дэмжлэгтэйгээр хөл дээрээ боссон, хөл алдаж унахаас аврагдсан олон хүний нэрс өнөөдөр ч санхүүжүүлэгчид хэмээн олны дунд яригдсаар байна. УИХ-ын ги­шүүн Су.Батболд, Б.Чой­жил­­сүрэн, Д.Одбаяр, Д.Тэрбиш­дагва, Д.Ар­вин, Байгаль орчны сайд асан У.Барсболд, Байгаль орчны сайд асан Г.Шийлэгдамба, Бо­ловс­ролын сайд асан Н.Бо­ло­рмаа, “Хадгаламж” банк­ны Ц.Чимэдцэрэн, Үйлд­вэр худалдааны дэд сайд асан Д.Сүрэнхор нарын хэн нь өнөөдөр түүн рүү тусламжийн гараа сунгаж байгаа вэ.
Энэ мэт таамаг нэрс дунд МАН-ын хүн гэгддэг атлаа МАХН-ынханд сэтгэлээ өгсөн “Гацуурт”-ын Л.Чинбат, “Петровис”-ын Ж.Оюунгэрэл нарын нэрс сонсогдож байна.  Тэднийг МАН-ын том санхүүжүүлэгчид гэдэг ч экс дарга болоод эдүгээ салан тусгаарласан МАХН-ынханд ч мөн гар сунган тусалж байгаа гэнэ. Дарга болоход нь далдаганаж гүйлдээд, нарсанд ороход нь сураггүй алга болсон нөхдийн хажууд унаж босч яваа энэ үед нь сэтгэлээ буруулаагүй нь харин ч хүн чанарын илэрхийлэл ч юм шиг. Басхүү тэднийг монгол хүний ууч сэтгэлээр унасан хүнийг өрөвдөж тусалж байгаа гэж ойлгох уу, урьдын авлага, өглөгөө барагдуулж байгаа гэж дүгнэх үү гэдэг нь эргэлзээтэй.