МАН-ын гишүүд, дэмжигчид өнөөдөр Сүхбаатарын талбайд 09.00 цагаас тайван жагсаал хийхээ мэдэгдээд байна. МАН-ын жагсаал хаврын чуулгантай давхцаж байгаа ч тус намынхны хувьд иргэн хүний амьд явах, эрүүл аюулгүй орчинд амьдрах, өмчтэй байх зэрэг Үндсэн хуульд заасан Монгол хүний эрх зөрчигдөж байна гэсэн байр суурь илэрхийлж, тайван жагсаалаа зохион байгуулна гэжээ.

Жагсаалд МАН-ын гишүүд, дэмжигчид, Бага хурлын гишүүд, Хяналтын танхим, залуучууд эмэгтэйчүүд, оюутны байгууллагууд болон ТББ-ууд оролцох аж. Мөн тэд Засгийн газарт хандан үнийн өсөлтийг хязгаарлах, хуулийн байгууллагууд хүний эрх зөрчиж буйг зогсоох, 100 мянган айл орон сууц хөтөлбөрийг үргэлжлүүлэх, цалин хөлсний доод хэмжээ болон тэтгэвэр тэтгэмжийг нэмэх талаар шаардлага тавих юм байна.