Эрүүл мэндийн яамнаас Түлэнхий төвийн барилгын ажилд онцгойлон анхаарч ажиллахаар болсон байна. Эрүүл мэндийн сайдын тушаалаар Түлэнхий төвийн барилгыг 2013 оны эхний хагас жилд багтаан барилга угсралтын ажлын гүйцэтгэгчийг сонгон шалгаруулж, ажлыг эхлүүлэхээр болжээ. Гэмтэл согог судлалын үндэсний төвийн харьяа “Түлэнхийн төв”- ийн барилга ашиглалтын төлөв байдалд Мэргэжлийн хяналтын ерөнхий газраас хийсэн удаа дараагийн хяналт шалгалтаар цаашид ашиглах боломжгүй, ослын байдалд хүрсэн гэсэн дүгнэлт гарсан байна.  Тус төвийн зүгээс уг барилгын асуудлаар Эрүүл мэндийн яам болон холбогдох байгууллагуудад хүсэлт гаргасны дагуу Монгол Улсын Төрийн өмчийн хорооны 2011 оны 358 тоот тогтоолоор уг барилгыг актлах тогтоол гарсан байна. Мөн онд Эрүүл мэндийн сайдын зөвлөлийн хурлаар салбар эмнэлгийн барилгын асуудлыг хэлэлцэн уг барилгыг буулгаж буурин дээр нь шинээр барих эмнэлгийн барилгын зургийг боловсруулах үүрэг даалгавар өгөгдсөн байна. “Түлэнхийн төв”-ийн барилгын газар олголтын талаар Нийслэлийн Засаг даргын захирамж 2011 онд гарсны дараа Эрүүл мэндийн яамнаас мөн оны долдугаар сард зарласан зураг төсөл боловсруулах зөвлөх сонгон шалгаруулалтад “ЭЗТ” ХХК шалгарч тус яамтай гэрээ байгуулан Түлэнхийн төвийн шинээр баригдах барилгын зураг төслийг боловсруулах ажлыг хийж гүйцэтгэж байна.

Одоогийн байдлаар барилгын архитектур төлөвлөлт буюу дотор гадна орон зайн төлөвлөлт, өрөө тасалгааны зохион байгуулалт, барилгын үндсэн хийц бүтэц, дотор цахилгаан, цэвэр бохир ус, халаалт салхивч, холбоо харилцаа, галын дохиоллын зургийг барилгын салбарт мөрдөгдөж байгаа норм ба дүрэм, стандартыг мөрдөн боловсруулжээ. Мөн бохир ус зайлуулах шугам, гадна цахилгаан, холбоо мэдээллийн зэрэг гадна шугам сүлжээний ажлуудын зарим зураг төсөл хийгдэж, хуучин барилгыг буулгах ажлын төсөв хийгдсэн байна.

Өнөөдрийн байдлаар 11 дүгээр хорооллын дулааны шугамыг өргөтгөх ажил хийгдээгүй, тус барилгыг дулаанаар хангах техникийн нөхцлийн нэмэлт тодруулга гарахгүй байгаагаас шалтгаалан гадна дулаан болон цэвэр усан хангамжийн шугам сүлжээний зураг төсөл боловсруулах ажил хойшлогдож байгаа боловч Эрчим хүчний яам, түүний харьяа байгууллагын зүгээс энэ асуудлыг шийдвэрлэхэд тусалж дэмжихээ мэдэгджээ.