Бага, дунд орлоготой иргэ­дийг орон сууцжуулах ажил хам­тар­сан Засгийн газрын үед биеллээ олж, олон залуу хос толгой хор­годох байртай болох нь хэмээн хөөрцөглөсөн нь эндүүрэл болох нь.  Бүр тэгээд өнгөрсөн гуравдугаар сард Засгийн газрын хуралдаанаас Орон сууцны санхүүжилтийн корпораци /ОССК/-аар  дамжуулж, төрийн албан хаагч­­­­­­­дад олгож буй орон сууцны зээлийн жилийн хүүг зургаан хувь руу буул­гах шийдвэрийг гарган, “Sale” зарлаад байсан нь мөн л үл­гэр болж мэдэх нь. Учир нь, ОССК татан буулгах талаар яригдаж эхэлжээ. Үүнийг Засгийн газрын хэрэг эрхлэх газрын дарга Ч.Хүрэлбаатар өчигдөр УИХ-ын Төсвийн байнгын хорооны хурал­даанд оролцох үедээ “ОССК-д бүтцийн өөрчлөлт хийнэ” гэж гоёоор тайлбарлана билээ. Эх сурвалжаас авсан мэдээллээр бол ОССК-ийг татан буулгахаар Засгийн газар бэлтгэлээ базааж эхэлжээ. Чухам ямар “чөтгөр” нь хатгаад таван жилийн өмнө бай­гуулж байсан ОССК-ийг татан буул­гах болчихсон юм бүү мэд. Гэх­дээ үүнд янз бүрийн үндэслэл гаргаж тавих эрхмүүд байна.
Тухайлбал, Засгийн газрын хурал­даанаас арав гаруй хоногийн өмнө “100 мянган айл орон сууц” хөтөлбөрийг хэрэгжүүлэх хүрээнд 300 тэрбум төгрөгийн бонд гаргахаар шийдвэрлэсэн нь банкуудын шуналыг хөдөлгөж эхэлсэн сурагтай.  Хүсэл сонирхлоо гүйцэлдүүлэхийн тулд Засгийн газрын гишүүдийг хатгасан юмдаг уу даа. Өнөөдүүл нь ч  яасан амархан лоббид нь хөтлөгддөг юм, арилжааны банкуудаар дамжуулж, орон сууцны зээлийг иргэдэд олгохоор тохиролцсон гэх. Одоогийн байдлаар арилжааны банкуудаас олгож буй орон сууцны зээлийн жилийн хүү 12 хувиас дээш байгаа юм. Засгийн газар орон сууцны зээлийн хүүг зургаан хувь руу буулгах шийдвэр гаргасан тул, хэлсэн амандаа хүрэхийн тулд иргэдэд олгохдоо энэ хэмжээнээс хэтрүүлж болохгүй гэсэн нөхцлийг арилжааны банкуудад тавьж болох ч, эргээд зөрүүг нь олгохоор асар их мөнгө төлөх болж байгаа аж. Өөрөөр хэлбэл, ОССК-иар дамжуулан зээл олгосон тохиолдолд жилдээ хоёр ху­вийн зөрүүг төр даах байсан бол арилжааны банкаар дамжуулсан нөхцөлд дор хаяж зургаан хувийн хүүг зөрүүнд нь өгч, арилжааны бан­куудыг тэтгэх арга хэмжээ болж хувирах аж.  
Бас нэг мэдээлэл байгаа нь Мон­голын Ипотекийн корпорацийн зүгээс “100 мянган айл орон сууц” хөтөлбөрийг  хэрэгжүүлэх сонирхлоо арилжааны банкуудтай хамтран илэрхийлсэн гэх. Тус корпорацийн хувьд арилжааны банкуудын хувь нийлүүлсэн хөрөнгөөр байгуу­лагдсан тул ОССК-ийг татан буул­гасан нөхцөлд үйл ажиллагааг нь Монголын Ипотекийн корпораци үргэлжлүүлж магадгүй гэх мэдээлэл бас байгаа юм. Харин УИХ-ын гишүү­­дийн хувьд “ОССК-ийг татан буул­гахыг хүлээн зөвшөөрөхгүй байна. Хэрвээ орон сууцны зээлийг арилжааны банкаар дамжуулах л юм бол, төрөөс гаргасан 300 тэрбум төгрөгийн бонд салхинд хийсэн ал­га болно. Өөрөөр хэлбэл, Засгийн газ­рын бондоор дамжуулж иргэдийг урт хугацааны орон сууцтай болгох нэрийн дор арилжааны бануудыг 20 жил хүүгийн зөрүүгээр төр тэжээх арга хэрэгсэл болж хувирах тул ийм төлөвлөгөө УИХ-д орж ирсэн тохиолдолд дэмжихгүй хэмээн гэ­дийж байна. Гэхдээ Засгийн газраас оруулж ирсэн төсөл, хөтөлбөрийг УИХ-ын гишүүд аман дээрээ зад шүүмжилдэг ч ихэнх тохиолдолд гар өргөн дэмжчихдэг тул, ОССК-ийг  татан буулгах төлөвлөгөө  хэрэгжих боломж өндөр гэх мэдээлэл хүчээ авч эхлэв. Үйл явдал хэрхэн өрнөхийг л харж л суухаас даа.
Уг нь татан буулгуулахдаа ту­лаад буй ОССК-нь нэг жилийн хугацаанд 3000 шахам тө­рийн албан хаагчдыг орон сууцтай болгож, буян үйлдсэн. Тиймээс олон нийт ам сайтай байгаа ОССК-ийг татан буулгах дээрээ тулбал, иргэд эсэргүүцэн дургүйцэх магадлалтай.
Арилжааны банкууд тэгвэл арав орчим жилийн хугацаанд 2000 хүрэхтэй үгүйтэй иргэдийг орон сууц­тай болгосон. Зээлийн хүү нь хэд гээч, эхэндээ 24 хувь байсан одоо харин буугаад сарынх нь хүү 1.1 хувиар хэмжигдэж байна. ОССК-ийн орон сууцны зээлийн хүү жилийнх нь зургаан хувь. Том зөрүү байгаа биз.

Г.Дарь