Гадаадын иргэдэд охидын биеийн үнэлүүлдэг бүлэглэлийг Эрүүгийн цагдаагийн газраас саатууллаа. Одоогоор уг хэрэгт ОХУ-ын иргэдийг холбогдуулан шалгаж байгаа бөгөөд хэргийг УМБГ-т шалгаж байна. Тэд удаа дараагийн үйлдлээр 30 орчим охины биеийг гадаадын иргэдэд үнэлүүлсэн аж. Тодруулбал, Баянзүрх дүүргийн 14-р хорооны нутаг дэвсгэр Кино үйлдвэрийн эсрэг талд байрлах гадаадын хөрөнгө оруулалттай “Орос байшин” ХХК-ны “Эрхүүгийн амралтын төв”-д “Жуулдад зориулсан үйлчилгээ” нэрээр Монгол охидыг санал болгож, биеийг нь үнэлүүлж байжээ.

Тиймээс цагдаагийн байгууллагаас Эрхүүгийн амралтын төв-ийн үйл ажиллагааг зогсоон шалгаж байгаа юм байна. Тус амралтын газар нь өмнө нь бассайнд нь хүн живж нас барсан асуудлаар цагдаагийн байгууллагад удаа дараа шалгагдаж байсан боловч хэрэг нь хэрэгсэхгүй болж үйл ажиллагаагаа явуулсаар байсан аж.

Эрүүгийн цагдаагийн газраас өмнө нь мөн бага насны охидуудын биеийг зохион байгуулалттайгаар үнэлүүлж байсан бүлэг этгээдийг илрүүлэн УМБГ-т шилжүүлэн өгсөн билээ.