Аз жаргалтай зүүдээ манаж байсан шөнө дунд арчаагүй эрийн уурын мунхаг, архины солионоос болж нэгэн халуун ам бүл саяхан галд шатаж, түлэгдсэн. Уурлаж хорссон хүргэн нь шөнө дунд хадмынхаа гэрт нь бензин цацаж, галдан шатаачихаад “Тэгээд шатаж л байг. Хамтдаа дуусъя” хэмээн ярьж зогссон гэх. Харин хэрэгтэн н.Наранбаатар өөрөө 40 хувийн түлэгдэлтэй Түлэнхийн төвд эмчлүүлж буй. Чингэлтэй дүүргийн цагдаагийн хэлтсээс түүнд эрүү үүсгэн шалгаж байгаа бөгөөд түүнийг аль шатахуун түгээх станцаас шатахуун худалдан авсан болохыг тогтоохоор шалгаж эхэлжээ. Уг нь бол шатахууныг ил амсартай саванд худалдаалахыг хориглосон байдаг. Гэтэл н.Наранбаатар гэгч эр башир санаагаа хэрэгжүүлэхийн тулд Хайлаастын уул руу шөнө дөлөөр савтай бензин бариад очсон байх юм. Уг нь эрүүл хүн бол уул руу өгсөх энэ хооронд уур бухимдал нь намдаж, ийм аймшигт хэрэг хийх санаагаа үлдэн хөөж болохоор хугацаа зарцуулна. Гэтэл тэр тэгсэнгүй. Өнөр өтгөн нэгэн гэр бүлийг галдан шатаачихаад, амь тэмцэн гэрээс гарахыг оролдсон хүмүүсийн эсрэг хаалгыг нь дарж, “хамтдаа дуусъя” гээд зогсч байж. Гэр бүлийн гишүүдийн тав нь /Гурав нь өнгөрсөн долоо хоногт, хоёр нь өчигдөр нас баржээ/ хэдийн бурхны оронд мордсон. Түлэнхийн төвд хэвтэн эмчлүүлж буй, амьд үлдсэн нэг залуу 90-95 хувийн түлэгдэлтэй байгаа нь эмч нарын болоод энгийн иргэдийн санааг түгшээж байна.

Гэтэл саяхан гэмт хэрэгт сэжигтнээр татагдаж, төрийн хамгаалалтад орчихсон байсан дуучин залуу галд шатаж түлэгдсэн хэрэг гарлаа. Урьдчилан хорих төвд хоригдож байсан түүнийг сахилгын өрөөнд оруулсны дараа гал гарч тэрээр “шатсан” гэсэн мэдээлэл байгаа ч хууль хяналтынхан түүнийг өөрийнхөө амийг хорлохыг завдсан хэмээж байна. Харин шоронд гал гарч, хүний амь нас хохирох шахсан эл үйлдлийг өөрсдийн албан тушаалаараа хариуцдаггүй юм гэхэд учир шалтгааныг нь олон нийтэд үнэн зөвөөр мэдээлэх үүрэг хууль хяналтын удирдлагуудад баймаар юм. Согтуурхсныхаа төлөө эрүүлжүүлэхэд орсон хүмүүсийн амиа хорлож болзошгүй бүхий л зүйлсийг хурааж авдаг байтал урьдчилан саатуулах төвд хоригдож байсан түүнд өөрийгөө “зулын гол” болгохоор гал гаргах зүйл хаанаас олдов гэдэг эргэлзээтэй.

Энэ мэт амьдаараа шатсан хэрэг үүгээр дууссангүй. Хоёр хоногийн өмнө буюу энэ сарын 25-нд Баянзүрх дүүргийн нутаг V хороо Монелийн гудамжинд хоёр хүүхэд гэртээ байх үед нь гал гарч, нэг хүүхэд нь шатаж амиа алдсан харамсалтай хэрэг гарч, олон хүний зүрхийг шимшрүүллээ. Тухайн үед 6, 14 настай хоёр хүүхэд гэртээ байсан бөгөөд зургаан настай хүү галаар тоглон гал алдаж, ахынхаа аминд хүрсэн байж болзошгүй хэмээн цагдаагийнхан таамаглаж байгаа аж. Хавар болж хуурайшилтын цаг болохоор ой хээрийн түймэр гарч олныг хиртхийлгэдэг байсан бол энэ мэт “хүний түймэр” ар араасаа гарч олон сайхан хүмүүсийн алтан амийг авч одсоор байна. Нийгмийн сэтгэлзүй ямархан байгаа, хүний мөс чанар ямар хэмжээнд хүрсний тод илрэл энэ буюу.