Хойд Солонгосын зүгээс АНУ-ыг дахин нэг өдөөн хатгасан видео бичлэг “YouTube” сайтад байршуулжээ. Энэ удаад АНУ-ын төр, захиргааны удирдлагууд байрлах Вашингтоныг байгаа болгосон байна. Хойд Солонгосын “Uriminzokkiri” сайтаас байршуулсан дөрвөн минутын эвлүүлэг бичлэгт Ким Чен Уны арми Вашингтон руу алсын тусгалын баллистик пуужингаас гадна өөр олон төрлийн зэвсгээр гал нээж буй болон тус улсын армийн сүр жагсаал зэргийг харуулжээ.

Үүнээс өмнө өнгөрсөн сард Хойд Солонгос Нью-Йорк хотыг бөмбөгдөж буй видео бичлэгийг “YouTube” сайтад байршуулаад байсан юм.

Хойд Солонгос, АНУ болон Өмнөд Солонгос улсуудын хоорондох зөрчил, сөргөлдөөн өнгөрсөн сард Хойд Солонгос пуужин хөөргөснийг эсэргүүцэн АНУ НҮБ-ын Аюулгүйн зөвлөлд тус улсын эсрэг авч хэрэгжүүлж буй хориг арга хэмжээгээ чангатгах тогтоолын төслийг өргөн барьж батлуулснаас эхэлсэн юм. Үүний дараа Хойд Солонгос өнгөрсөн хоёрдугаар сард дахин цөмийн туршилт хийснээр байдал улам хурцадсан. Харин энэ сарын эхээр Хойд Солонгосын эсрэг НҮБ-ын шинэ хориг арга хэмжээ хэрэгжиж эхэлсэнтэй холбоотойгоор БНАСАУ-ын зүгээс өмнөдтэй байгуулсан 1953 оны гал зогсоох энхийн гэрээгээ цуцалж, Солонгосын хойгт түгшүүрт байдал үүссэн билээ.