Программ хангамжийн салбарт тэргүүлэгч “Microsoft” корпораци “Project Pink” загварын гар утаснуудаа танилцууллаа. Эдгээр шинэ загварууд нь Kin One болон Kin Two нэрээр худалдаалагдах юм. MySpace, Facebook, Twitter зэрэг нийгмийн харилцааны сайтууд олны анхаарлыг татах болсон энэ үед программ хангамжийн мангасууд энэ салбарт чиглэсэн гар утас бүтээжээ. Дээр дурдсан шинэ загварын хоёр гар утас нь ерөнхийдөө залуу хэрэглэгчид, ялангуяа өсвөр насныхан болон залуучуудад зориулсан бүтээгдэхүүн юм. Компанийн зүгээс Windows Phone 7 үйлдлийн систем нь амьдралын хэв маягийг хялбарчлах бол Windows буюу Kin загварын гар утас нь өдөр тутмын амьдралыг илүү өнгөлөг болгоно хэмээн мэдэгдээд байна.
Kin загварын гар утаснууд нь Windows CE цөм дээр суурилсан бөгөөд хоёул Windows Phone 7 гэх смартфөүнд зориулсан үйлдлийн системтэй байх юм.
Kin One нь доошоо гулгаж гарах QWERTY товчлууртай арай жижиг хувилбар бөгөөд 4GB багтаамжтай, LED гэрэл бүхий 5.0 мегапиксель камертай, QVGA дэлгэцтэй ажээ. Харин Kin Two нь арай том хувилбар бөгөөд хажуу тал руугаа гулгаж гардаг QWERTY товчлууртай, 8GB багтаамжтай, 8.0 мегапиксель дижитал камертай, HVGA дэлгэцтэй юм байна. Kin One болон Kin Two гар утас нь хоёул 3G сүлжээг дэмжиж ажиллахаас гадна Wi-Fi, Bluetooth холболттой ажээ. Эдгээр гар утас ирэх тавдугаар сард худалдаанд гарах ба үнийн талаар “Microsoft” хараахан мэдээлээгүй байна.

С.Цэлмэг