Морьтойгоо гайхуулаад бай­даг монголчууд хэрэгцээндээ гад­ны улсаас морь худалдан авдаг болчихож. Өнгөрөгч даваа гаригаас Сүхбаатарын талбай, Бөмбөгөр худалдааны төв, Их дэлгүүр орчимд  морьтой цагдаа шогшуулах болов. Баяр наадмаар л үзэгддэг морьтой цагдаа нар одоо энгийн өдрүүдэд ч эргүүлд гарахаар болжээ. Энэ удаа цаг­даа нар морь, эмээл, хувцас хэрэг­лэлээ шинэчилсэн нь нүдэнд содон тусч байв. Морь унасан эргүүлийн  цагдаа нарыг хэсэг ажиг­лаж саатлаа. Сүхбаатарын талбайн зүүн талд буюу “Central tower”-ийн ойролцоо нэг нь хонгор халзан, нөгөөх нь хүрэн зүсмийн морь унасан хоёр цагдаа нүдний шил, хувцас хэрэглэлээрээ ижилсэж, их л сүртэй явцгааж байх юм. Хэв журам сахиулах эргүүлийн цагдаа гэхээсээ гудам­жаар холхих хүмүүсийн нүдийг “хужирлах” үзүүлэн ч гэмээр юм уу. Тэд гадаадын өндөр үнэтэй морь унаж, кобой малгай өмссөнөөрөө хэв журмыг сайн сахиулах уу,  явган эргүүлээс  ямар давуу талтай вэ гээд асуулт  хөвөрнө. Дээрх  ажлыг нийслэлийн Цагдаагийн газрын харьяа Хөдөл­­гөөнт эргүүлийн газраас санаачлан зохион байгуулж бай­­гаа гэх. Цагдаагийнхан хо­тын төвд хэв журам сахиулах зорил­гоор Буриад улсаас сайн үүлдрийн морьд, өөр хаанаас ч юм малгай, эмээл, бас урдаас нүдний шил худалдан авсан юм байх. Албан бус эх сурвалжийн мэдээллээр морьдын нэг бүрийн үнэ 10 орчим мянган доллар гэнэ. Хэрэв үнэн бол хурдан удмын морь авах мөнгө шүү дээ. Их мөнгө шүү. Морьдоо сургаж, номхруулах, эргүүлд гарах бэлт­гэлээ хийх гээд нэлээд хугацаа зарцуулсан гэж байгаа. Одоогийн байдлаар  Сүхбаатар дүүргийн нутаг дэвсгэрт зургаан морьтой эргүүл гарсан бол “Туул” гол дагуу  морьтой цагдаа нар эргүүл хийж байгаа аж. Урин дулааны улиралд “Туул” гол орчмоор хэрэг зөрчил  ихэсдэг учир морьтой цагдаа нар цулбуураа эргүүлээд, болдоггүй нөхдүүдийг болгоод өгөх бололтой. Харин камерын нэгдсэн систем, замын цагдаа, явган, машинт эргүүл цөм бүрдсэн хотын төвд ганган хээнцэр “том” морьтой цагдаагийн хэрэг бий юу.  Гадаад дотоодын жуулчдад “Морьтой монгол”-ын сүрийг гайхуулах гэсэн бол бие жижиг ч гэлээ дэлхийн талыг туулсан монгол морьдоо “сонгох” байсан биз. Эх оронд нь хэдэн саяар тоологдох адуу байхад буурайгаа мэдэхгүй Буриа­даас мөнгөтэй хүн шиг морьд авсныг гайхаад байна.

Төсвийн хөрөнгөөр санхүүж­дэг цагдаагийн байгууллага гэмт хэргээс урьдчилан сэргийлэх, таслан зогсоох, илрүүлэх ажилд техник хэрэгсэл, хангамж дут­магаас гар мухарддаг нь нууц биш. Адаглаад л хөдөлгөөнт эргүүлийнхний алаг тэрэгний 10 литр бензин хангалттай хүрэлц­дэггүй. Үймээн самуун, зодоон цохион болох үед өмнөө барих хамгаалалтгүй эргүүлийн цагдаа нар зодуулж, эрүүл мэндээрээ хохирсон тохиолдол цөөнгүй бий. Эдгээр асуудлыг бүгдийг нь нэг дор шийдвэрлэж чадахгүй юм аа гэхэд төсвийн мөнгийг тоомсог морь худалдан авахад зарцуулах ёсгүй. Үнэхээр морьтой эргүүл байх шаардлагатай бол монгол морьдоо сургах хэрэгтэй гэх хүн олонтаа таарав. Албан хаагчиддаа анхаарал бага хандуулдаг цагдаа­гийн удирдлагууд аягүй бол гадаадын ямбатай морьддоо тэн­дээс нь тэнгэрт хадсан үнээр тэжээл авч тансагласан ч байж мэдэх юм.

Монгол адуугаар эргүүл хийхээр ахиц гардаггүй, тоомсо­гоор хийвэл хэрэг буурдаг бол одоо яая гэхэв. Гаднаас аваад бай.  Ер нь тэгээд энэ бизнесээс хэн гэдэг дарга нь хэдэн төгрөг завшсан юм бол доо, бүү мэд.