БНАСАУ-ын ирээдүй улам бүдгэрээд байна уу, эсвэл залуу удирдагчийн шийдэмгий шийдвэ-рүүд улсынх нь ирээдүйг харанхуй нүх руу “чирсээр” байна уу. Ямартай ч дэлхий нийт тус улсыг эергээр бус сөргөөр хүлээж авах боллоо. Дэлхийн тойрог замд өөрсдийн гэсэн хиймэл дагуулыг байрлуулаж, хөөргөх ажиллагаа амжилттай болсоноор бүс нутгийн хувьд цаг давчуу болсон мэт сандралдаж эхэлсэн.
Өмнө нь тулгарах асуудал болгоны өмнүүр ордог байсан БНХАУ хүртэл сандралдаж Хойд Солонгосын удирдагч нарт албан бичиг хүргүүлсэн. Дээрх албан бичигт “Бүс нутгийн аюулгүй байдлын төлөө сансрын хиймэл дагуулыг сануулга үл хайхран хөөргөсөнд харамсч байна. Цаашид ч энэ тал дээр шүүмжлэлтэй байр сууринаас хандана” гэх утга бүхий мэдэгдэл хийсэн. Эх сурвалжууд энэ байдлыг янз бүрийн өнцгөөс тайлбарлаж байна.
Яг өнөөдрийн байдлаар Хойд Солонгос улсад тавьсан хориг арга хэмжээнээс тус улсад тусламж үзүүлэх цорын ганц орон ОХУ болж байна. Залуу удирдагч Ким Чен Уны эцэг Ким Чен Ирийг амьд сэрүүн байхад БНХАУ цэрэг армийн зэр зэвсэг, хоол хүнсээр байнга тусламж үзүүлдэг байсан нь нууц биш. Харин залуу удирдагчийн гаргасан шийдэмгий алхам сайн хөрш хятадуудын итгэлийг алдах шалтгаан болсон талаар CNN агентлаг өгүүлэв.
Газар зүйн байрлалаар ч тэр БНХАУ-аар дамжин өнгөрдөг байсан бүхий л гарц хаагдсан гэ-хэд хилсдэхгүй. Дэлхий нийт гол анхаарлаа ОХУ-ын ГХЯ-ны байр суурьт хандуулж байна. Энэ бүхнийг эх сурвалжууд “Хойд Солонгосын цөмийн туршилтын үр дагавар” хэмээн үзэж байгаа. НҮБ-ын Аюулгүйн Зөвлөлөөс Хойд Солонгосын талаар хориг арга хэмжээ авах тогтоолыг санал нэгтэй баталсны дараагаас Хойд Солонгосын нөхцөл байдал хүндэрсэн. Тус улсыг цөмийн туршилт хийнэ гэхэд л дэлхий нийтийн анхаарлыг “цөмийн туршилт хийсний дараагаас Зүүн хойд Азид ямар өөрчлөлт гарах бол” гэсэн яриа гарах болсон юм.
Санхүү, эдийн засгийн гадаад харилцаанд НҮБ-аас хориг тавьснаар бүгд ядуурч, ард иргэдээ хоол хүнсээр хангаж чадахгүй болтол нь нөхцөл байдлыг хүндрүүлэх нь АНУ-ын гол зорилго. Хэрэв Хойд Солонгос пуужин харвах юм бол хөрснөөс арчигдана гэдгийг хэн бүхэн ойлгож байгаа болов уу. Тиймээс эдийн засгийн хориг арга хэмжээ авч байгаад цөмийн туршилт хийх бүхий л арга замыг хааж, бүс нутгийн аюулгүй байдалд анхаарах нь НҮБ болон АНУ, тэр тусмаа БНХАУ-ын туйлын хүсэл болоод буй. Хятадын Ази Номхон далай дахь нөлөөллийн тэлэлтийг зогсоохоор АНУ Хятадыг хүрээлсэн бүх оронтой харилцаагаа идэвхитэй өргөжүүлж байна. Нэг хэсэг эдийн засгийн хүйтэн дайн шиг өрсөлдөөн үзүүлж байсан хоёр улсын харилцаа сэргэж эхэлсэн.
БНХАУ-ын байр суурь НҮБ болон дэлхий нийтэд эергээр нөлөөлж эхэлсэн. Учир нь эдийн засгийн хүндрэлд орох дөхсөн хятадууд бүс нутгийн аюулгүй байдалд хамгийн их анхаарах нь ойлгомжтой тул БНАСАУ-ыг ийнхүү хөршийн жагсаалтаас гаргаж буй нь учиртай. Зөвхөн БНХАУ ч гэлтгүй Хойд Солонгосын цөмийн туршилтын эсрэг Зүүн хойд Азид ашиг сонирхолтой бүх орнууд нэгдээд байна. Эцэст нь Хойд Солонгос илүү хүчтэй цөмийн туршилтаа хийвэл НҮБ-ын хориг улам л чангарна. Түүний дотор гадаадад ажиллах хүч гаргахыг нь хориглох магадлал өндөр.
Өнгөрсөн тавдугаар сард “БНХАУ Хойд Солонгост яаралтай тусламж үзүүлнэ” хэмээн хэвлэлүүд бичиж байсан. Тодруулбал, Хятад улс БНАСАУ-д эдийн засгийн яаралтай тусламж үзүүлэхээр болсон, үзүүлсэн. Тусламжид 500 мянган тонн хоол хүнс, 250 мянган тонн нефть багтсан. “БНХАУ-ын ард түмнээс” гэсэн тусламжийн цуваа БНАСАУ-ын их удирдагч Ким Чен Ирийг таалал төгссөний дараахан очсон. БНХАУ-ын дарга Ху Жинтао Бээжинд байрладаг БНАСАУ-ын Элчин сайдын яаманд очиж, Хойд Солонгосын удирдагч агсан Ким Чен Ир нас нөгчсөнтэй холбогдуулан эмгэнэл илэрхийлж залуу удирдагчийг дэмжихээ амласан. Цэргийн салбарт хүртэл нэг жилийн өмнө хамтарсан сургуулалт хийж, зэвсгийн шинэчлэл хийх шийдвэрүүд гарсаар байсан юм. Жишээ нь, цэргийн техник, тоног төхөөрөмжийн хангамжийг сайжруулах салбарт хамтран ажиллах талаар Өмнөд Солонгос болон БНХАУ хамтран ажиллах гэрээнд удахгүй гарын үсэг зурах талаар хэвлэлүүд онцолж байв. Жилийн дотор бүх зүйл өөрчлөгдсөн. Цэргийн тагнуулын салбарт хамтран ажиллах гэрээнд гарын үсэг зурахад чиглэгдсэн хэлэлцээрийг Өмнөд Солонгосын тал Японтой үргэлжлүүлэх талаар талууд өөрсдийн байр сууриа илэрхийлж байсан юм. Зүүн Азийн орнуудаас Филиппин НҮБ-д энэ асуудлаар хандаж, Хойд Солонгосын пуужин үнэхээр баллистик пуужин мөн эсэхийг нарийн шалгаж тогтоохыг хүссэн албан бичиг хүргүүлсэн.
Ямартай ч эдийн засгийн хүнд байдалд байгаа Хойд Солонгост тус болох орон ОХУ-аас өөр үлдээгүй бололтой. Тэдэнд нөхцөл байдлыг сайжруулах цорын ганц арга зам л үлдлээ. Тэр нь цөмийн туршилт хийхгүй, уран баяжуулахгүй, баллистик пуужин хөөргөж сансарын хиймэл дагуул нэрийн дор туршилт хийхгүй байхад л Хойд Солонгосын ард түмний болон улс орны нөхцөл байдал сайжирна.
Эх сурвалж: "УЛС ТӨРИЙН ТОЙМ" сонин