Үндэсний статистикийн хороо­ноос гаргасан ээлжит судалгааг харахад Монголын эдийн засагт эерэг боломжууд нээгджээ. Энэ нь мэдээж ашигт малтмалын ач буян. Газрын хэвлий доорх эрдэнэс баял­гаа дэлхийн зах зээлд  гаргасны хүчинд Монгол Улсын авдар дахь мөнгөний хэмжээ багагүй өссөн бололтой. Өмнөх жилүүдэд байн­гын алдагдалтай гарч байсан улсын төсөв өнгөрсөн оны сүүлчээс ашигтай гэх тоон үзүүлэлт рүү шил­жээд байгаа. Тодруулбал, улсын нэгдсэн төсвийн нийт орлого ба тусламжийн дүн 2011 оны эхний улиралд 925.4 тэрбум төгрөг, нийт зарлага ба эргэж төлөгдөх цэвэр зээлийн дүн 821.5 тэрбум төгрөг болж, нийт тэнцэл 103.9 тэрбум төгрөгийн ашигтай гарлаа. Нэгдсэн төсвийн урсгал орлого 902.7 тэрбум төгрөг, урсгал зардал 739.8 тэрбум төгрөг болж, урсгал тэнцэл 163.0 тэрбум төгрөгийн ашигтай гарчээ. Аливаа хувь хүн, аж ахуйн нэгж, улс орон ашигтай ажиллаж байна гэдэг амьдрал сайжрахын нэр юм. Гэхдээ банкны салбарт нүүрлэсэн чанаргүй зээлийн хэмжээ нэмэгдсэн гэх таагүй үзүүлэлт ч байна.  Өмнөх оны мөн үеийнхээс татварын нийт орлого 319.6 тэрбум төгрөг буюу 66.5 хувиар өсөхөд орлогын албан татварын болон дотоодын бараа, гадаад худалдааны татварын голлон нөлөөлсөн гэнэ. Түүнчлэн Монгол Улс 2011 оны эхний улиралд дэлхийн 101 оронтой худалдаа хийж, гадаад худалдааны нийт бараа эргэлт 1830.0 сая ам.доллар, үүнээс экспорт 742.1 сая ам.доллар, импорт 1087.8 сая ам.долларт хүрсэн байна.

Гадаад худалдааны тэнцэл өнгөрсөн оны гуравдугаар сард 94.1 сая ам.долларын алдагдалтай гарч байсан бол 2011 оны гуравдугаар сард 145.9 сая ам.долларын мөн алдагдалтай гарсан  гэх сөрөг үзүүлэлт ч гарчээ.

Чихэнд чимэгтэй нэгэн мэдээлэл нь хэрэглээний сагсан дахь үнийн индекс өнгөрсөн сараас буурсан явдал.  Дээшээ, бүр дээшээ хэмээн баяртайгаар хөөрөгдөж явсан инфляци харьцангуй буурсан гэнэ.  Өнгөрсөн сард инфляци 11 хувьтай байсан бол Үндэсний статистикийн хорооны мэргэжилтнүүдийн гаргасан тооцоогоор бол 0.8 хувиар буурсан байна. Энэ үнэн бол монголчуудын амьдрал сайжрах боломжтой гэсэн үг. Учир нь инфляцийн өсөлт энгийн иргэдэд илүү хүндээр тусдаг, ялангуяа эмзэг бүлгийнхэнд илүү мэдрэгддэг хэмээн мэргэжилтнүүд тайлбарладаг. Аж үйлдвэрийн сал­ба­рын бүтээгдэхүүний нийт үйлд­вэрлэл 2005 оны зэрэгцүүлэх үнээр 2011 оны эхний улиралд 422.6 тэрбум төгрөг болж, өмнөх оны мөн үеийнхээс 28.5 тэрбум төгрөг буюу 7.2 хувиар өссөн байна. Үүнээс харахад манай аж үйлдвэ­рийн салбарт сэргэлт иржээ. Дээрх өсөлтөд уул уурхай, олборлох аж үйлдвэрийн салбарын алт, нүүрс зэрэг нэр төрлийн бүтээгдэхүүний үйлдвэрлэл 10.0-59.2 хувь өссөн нь голлон нөлөөлж. Харин архи, шар айраг,ундаа сүү, гурилан бүтээг­дэхүүн, бетон зуурмаг, тэмээний ноосон хөнжил, хаалга, цонх, төм­рийн хүдэр, цемент, зүсмэл материал зэрэг боловсруулах аж үйлдвэрийн салбарын үндсэн нэр төрлийн бүтээгдэхүүний үйлдвэрлэл  “бяцхан” өсөлттэй гарч. Энэ өсөл­тийг л нэмэгдүүлж чадвал баял­гийн хараалд нэрвэгдэхвий гэсэн эмзэглэл алга болох юм. Тэгэхгүйгээр аж үйлдвэрийн салбарын 60 хувийн өсөл­тийг уул уурхай эзэлж байгаа тохиолдолд энэ хараалд идэгдэхгүй гэсэн баталгаа алга байна. Эдгээр тоо бүхнийг уншиж, ойлгоход хэцүү ч үүний цаана бидний идэх хоол, өмсөх хувцас, өнөөдрийн бо­лон ирээдүйн амьдрал явж байгаа гэдгийг мартаж боломгүй учраас Үндэсний статистикийн тайланг мэдээг өнгийж харахаас өөр аргагүй юм.